АКШнын жаңы шайланган президенти Дональд Трамп азыркы мамлекет башчысы Жо Байденди АКШнын тарыхындагы эң начар президент деп атап, анын саясаты өлкөгө олуттуу зыян келтиргенин айтып, бул тууралуу өзүнүн Truth Social баракчасына жазды.
Ал “Мен Байдендин ачык чек ара саясаты жөнүндө митингдерде жана башка жерлерде көп жолу айттым, Америкада радикалдык исламдык терроризм жана зомбулуктун башка түрлөрү менен кырдаал ушунчалык начар болуп, ага ишенүү кыйын болот. Ошол убакыт келди, баары өзгөрдү. Биз ойлогондон да жаман болуп калды”, – деп кошумчалаган өзүнүн баракчасында.
Ошондой эле Трамп азыркы президентти жана анын айланасындагыларды шайлоону бурмалап, бийликке болгон ишенимди кетирип жатат деген.
Белгилүү болгондой, Трамп Байденди дайыма сындап келет, айрыкча анын иммиграция саясатын. Ачык чек ара саясаты АКШда террористтердин күчөшүнө жана кылмыштуулуктун өсүшүнө алып келгенин шайланган президент баса белгилейт. Ал мындай чечимдерди улуттук коопсуздукка коркунуч жана Байдендин администрациясынын эң чоң катачылыктарынын бири деп атайт.
Эскерте кетсек, Дональд Трамптын инаугурациясы Вашингтондогу Капитолийде өтөрү белгиленген. Иш чара 2025-жылдын 20-январына пландаштырылган.
Салт боюнча, бул күнү жаңы шайланган президент жана вице-президент менен алардын жубайлары Ак үйгө келишет, аларды кызматтан кетип жаткан президент жана вице-президент, ошондой эле жубайлары менен тосуп алышат. Бул салт бийликти тынчтык жолу менен өткөрүп берүүнү билдирет.
2021-жылы Трамп АКШ президенти Жо Байдендин инаугурациясына бойкот жарыялаган.

















