Тажикстандан Россиянын шаарларына билет сатып алгандардын саны 20%-30%га азайды.
«Крокус Сити Холлдогу» терактан жана Россиядагы андан кийинки окуялардан улам тажикстандыктардын ал жакка баруусу солгундай түштү.
«Азия-Плюс» маалымат каражатына авиакомпаниялардын өкүлчүлүктөрүнүн билдирүүсүнө караганда, азыркы учурда бул өлкөгө авиабилеттерди сатуу азайып, ал тургай мурда алынгандар кайтарылууда.
Мисалы, «Сомон Эйр» авиакомпаниясы ушундай маалымат берген.
«Азыркы учурда РФна билет сатуу азайгандыгы байкалууда, ал эми мурда сатып алынган билеттерди кайтаруу орточо 20%га жетүүдө. Анткен менен биз жакынкы күндөрү кырдаал мурдагы калыбына келет деп үмүттөнөбүз», – деп билдиршкен авиакомпаниядан.
Душанбедеги авиакассалардын биринин кызматкеринин сөзү боюнча, жүргүнчүлөрдүн саны азайгандыгына байланыштуу каттамдар да кыскарган.
«Ураль авиалиниясынан», эгер мурда «Жуковский» аэропортуна 3 каттам болсо, азыр бир эле самолёт учуп калды. Дээрлик күн сайын билеттер кайтарылууда, адамдар коркуп калышкан, ал жакта (Россияда) мигранттарды аябай кыйнап жаткандыгын айтышууда. Ошондуктан кырдаал калыбына келишин күтүүдөбүз», – деп жооп берген кызматкер.
Башка авиакассаларда, мисалы, россиялык «S7 Аirlines» компаниясынан билеттерди негизинен терактан кийинки алгачкы күндөрү, 24-26-мартта кайтарышкандыгын билдиришти.
«Бизге билеттер 24-мартта кайтарылды. 2-3 билетти кайтарышты, айрымдары кийинки мезгилге которушту. Азыр баардыгы жакшы», – деп билдирди кассадан.
Дагы бир кассадан адамдар «баары өзгөрөт» деген үмүт менен билетин апрелдин аягына кайра которушкандыгын айтышты.
«25-мартта 40 билетти кайтарышты, 26-мартта – 30 билет жана 27-мартта – 36 билет. Кайтарылбай турган билеттерди апрелдин соңундагы каттамдарга алмаштырышты. Бүгүн баары салыштырмалуу жакшы, бирок билет сатып алуу 30%га кыскарды», – деди авиакассанын кызматкери.
Башка авиабилет сатуучу негизинен адамдар азыр Москвага учуудан коркуп жатышкандыгын белгиледи.
«Биздин кассага 17 билетти кайтарышты. Адамдар интернеттен мигранттарды депортациялаган роликтерди көрүшүүдө. Бирок белгилей кетүүчү жагдай, негизинен документинде көйгөйү барларды депортациялашууда. Кимдин документи туура болсо, алар коркпой эле койсо болот», – деди ал.
Айтмакчы, бүгүн Душанбенин авиакассаларында дээрлик адамдар жок…


















