Тажикстандын продукциясы экспорттолгон 50 өлкөнүн ичинен алдыңкы бештикке Россия, Өзбекстан жана Кытай кирди.
Бул тууралуу өлкөнүн Экспорт агенттигинин төрагасы Бахриддин Сирожиддинзода мекеменин 2025-жылдын биринчи жарым жылдыгында аткарган иштери тууралуу маалымат берип жатып билдиргенин Sputnik жазды.
Тажик продукциясы экспорттолуп жаткан 50 өлкөнүн ичинен алдыңкы бештикке Россия, Өзбекстан, Түркия, Кытай жана Нидерланд кирет.
Маалымат жыйында Тажикстандан баалуу металлдарды жана таштарды эсепке албаганда, экспорттун көлөмү 953,1 миллион долларды түзүп, өткөн жылдын ушул мезгилине салыштырмалуу 255,1 миллион долларга же 36%га көп экендиги айтылды.
“Өнөр жай продукциясынын экспорту 919,3 миллион долларды түздү, бул 2024-жылдын ушул мезгилине салыштырмалуу 250,1 миллионго же 37,4%га көп”, – деди Сирожиддинзода.
Анын айтымында, ушул жылдын биринчи жарымында 33,9 миллион долларлык 90,3 миң тонна айыл чарба продукциясы экспорттолгон. Бул өткөн жылдын ушул мезгилине салыштырмалуу 13,2 миң тоннага же 5 миллион долларга көп.
Айыл чарба продукциясынын экспортунун структурасы негизинен төмөндөгүлөр тарабынан түзүлө тургандыгы белгиленди:
- 18,2 млн долларга кургатылган жемиштер (53,7%),
- жемиштер – 7,9 млн доллар (23,3%),
- жашылча – 4,7 млн доллар (13,8%),
- айыл чарба продукциясынын башка түрлөрү – 3,1 млн доллар (9,2%).
Экспорт агенттиги белгилегендей, “Тажикагропроэкспорт” мамлекеттик ишканасы Россия, Казакстан, Кыргызстан жана Түркияга өрүк, капуста, бадыраң, түстүү капуста, баклажан экспорттогон.
Тажикстандын расмий статистикалык маалыматына ылайык, өлкөнүн тышкы соода жүгүртүүсү 2025-жылдын биринчи жарымында 4,7 миллиард долларды түзсө, бул өткөн жылдын ушул мезгилине салыштырмалуу 316,8 миллион долларга же 7,2%га көп.



















