Америкадык окумуштуулар тамак-аш жана башка нымдуу калдыктарды экологиялык таза авиациялык күйүүчү майга айландыруу ыкмасын иштеп чыгышты. Ал күйүүчү май бардык стандарттарга толук жооп берет.
Бул изилдөө Science Advances (SA) журналына жарыяланды.
Тамак-аш калдыктары жана өсүмдүк биомассасы сыяктуу нымдуу калдыктарда майлар болот, аларды биокүйүүчү майга айландырууга болот. Бирок буга чейин мындай биокалдыктар эч бири авиация үчүн ылайыктуу болгон эмес: аларда кычкылтек калчу, ал коррозияга алып келет, мындан тышкары, алардын энергетикалык баалуулугу кадимки күйүүчү майга караганда төмөн болчу.
АКШдагы Биоэнергетикалык инновациялар борборунун окумуштуулары бул көйгөйдү молибден карбидине негизделген атайын нанобөлүкчөлөрдүн жардамы менен чечишти. Алар кычкылтекти толук тазалоого жана күйүүчү майдын сапатын жогорулатууга мүмкүндүк берет.
Иштелип чыккан биокүйүүчү май иштетүүдөн кийин кадимки авиациялык керосин менен бирдей касиеттерди көрсөттү: тыгыздыгы, күйүп кетүү температурасы, илешкектүүлүгү, тоңуу чекити жана башка параметрлери боюнча. Анын жылуулук берүү жөндөмдүүлүгү 46,5 мегаджоуль/кг түздү — бул жүргүнчү жана жүк ташуучу учактарда колдонулуучу Jet A күйүүчү майына дээрлик тең.
Бул — калдыктарды жогорку сапаттагы авиациялык күйүүчү майга айландыруу мүмкүн экенин далилдеген алгачкы изилдөө. Мындай технологиялар келечекте парник газдарынын бөлүнүп чыгышын азайтып, авиациянын мунайга болгон көз карандылыгын төмөндөтүүгө жардам берет.


















