Түштүк Кореянын түштүк-чыгыш бөлүгүн каптаган токой өрттөрүнөн кеминде 26 адам каза болду. Бул тууралуу Yonhap агенттиги билдирди.
“Өрттү өчүрүүгө ондогон тик учактар, 5 миңге жакын куткаруучу жана 560 техника тартылды”, – деп айтылат маалыматта.
Катуу шамал жана кургак аба ырайынан улам өрт адам жашаган кварталдарды талкалап, 27 миңден ашуун киши үй-жайын таштап кетүүгө аргасыз болду. Бул Түштүк Кореядагы акыркы он жылдагы эң ири өрт кырсыгы.
Андонг шаарынын бийлиги өрт ишемби күнү тутанып, ЮНЕСКОнун Дүйнөлүк мурастар тизмесине кирген бир нече объектилер коркунучта экенин билдирди.
Өрт менен күрөшүүгө ондогон тик учак жана миңдеген өрт өчүрүүчүлөр тартылганы кабарланды.
21-мартта Корей жарым аралынын түштүгүндөгү Санчхон округунда ондон ашык жерде төрт тутанган.
Бирок, өрттү өчүрүү иштерине катуу шамал жана кургак аба ырайы тоскоолдук кылууда. Учурда жалын 17 миң гектар токойду жана 209 үйдү жок кылды. Мындан тышкары, 681-жылы курулган байыркы Коунса ибадатканалар комплекси өрттөн кыйрап калды.
Түштүк Кореянын убактылуу президенти Хан Док Су бул токой өрттөрүн өлкө тарыхындагы эң оор кырсык деп атады.

















