Украинанын массалык маалымат каражаттарында Түркмөнстан тууралуу далилсиз жана чагымчыл мүнөздөгү билдирүүлөрдүн таралышына байланыштуу, бул өлкөнүн тышкы иштер министрлиги төмөнкүлөрдү билдирет.
Түркмөн тарап 2025-жылдын 8-июлунда украиналык «FREEДОМ» телеканалынын эфиринде айтылган, Түркмөнстанда интернетке жетүү боюнча «жабык» деген дооматтарды чындыкка дал келбеген, негизсиз жана бир тараптуу деп эсептейт жана бул боюнча нааразылык билдирет.
Мындай маалыматты таратып жаткан, Түркмөнстан тууралуу эч кандай түшүнүгү жок, өлкөгө бир да жолу барбаган, мамлекеттик жана коомдук мекемелер, ошондой эле түркмөн журналисттери менен эч кандай байланышы жок бул каналдын өкүлдөрүнүн мындай укукка кантип ээ болгону түшүнүксүз.
Белгилей кетүүчү нерсе, бул телеканал Түркмөнстан жөнүндө бурмаланган жана жалган маалыматтарды берүү менен коомчулукка дезинформация таратканы биринчи жолу болуп жаткан жок.
Бул окуялар Түркмөнстан тарабынан Украин элине өлкөнүн көз карандысыздыгынын башталышынан бери көрсөтүлүп келген көп жылдык экономикалык жана гуманитардык колдоонун фонунда болуп жатканы көңүл бурууга арзыйт.
Атап айтканда, 1990-жылдардан бери Түркмөнстан Украинага көп көлөмдө жаратылыш газын жеткирип келген. Мындан тышкары, бул убакыт ичинде бир катар украиналык компаниялар Түркмөнстанда энергетика, жол-транспорт, байланыш, инфраструктура жана башка тармактарда миллиардаган АКШ долларына тете долбоорлорду ийгиликтүү ишке ашырышты. Бул компаниялар бүгүнкү күндө да Түркмөнстанда иш алып барууда.
Жогоруда айтылгандарга таянып, айрым украиналык ММК өкүлдөрүнө: «Жакшылыкка жакшылык менен жооп берүү керек» деген акыйкат жана жалпы кабыл алынган принципти унутпоого чакырабыз.
Ушуга байланыштуу, Түркмөн тарап Украинадагы тиешелүү мамлекеттик органдардан, маалымат саясатына жооп берген мекемелерден жогоруда айтылган учурлардын кайталанышына жол бербөө үчүн украин мыйзамдарына ылайык тиешелүү чараларды көрүүнү талап кылат.



















