Түркия менен Бириккен Араб Эмираттары Анкарада эки тараптуу жети келишимге кол коюшуп, стратегиялык өнөктөштүктү бекемдешти.
Anadolu агенттигинин маалыматы боюнча, салтанат шаршемби күнү Түркиянын президенти Режеп Тайып Эрдоган менен БАЭ президенти шейх Мохаммед бин Заид Аль Нахайяндын катышуусунда Түркия-БАЭ Жогорку стратегиялык кеңешинин биринчи жыйынынан кийин өттү.
Жыйынга Түркиянын президенти менен БАЭ президентинен тышкары Түркиянын Инвестиция жана финансы башкармалыгынын башчысы Ахмет Бурак Даглыоглу, Тышкы иштер министринин орун басары Нух Йылмаз, ошондой эле БАЭнин инвестиция министри Мохаммед Хасан Аль Сувайди, министр Халифа Шахин Аль Марр жана дагы бир катар мамлкеттик жетекчилер катышты.
Маалыматта белгиленгендей, Туркиянын президенти өз сөзүндө Жогорку деңгээлдеги стратегиялык кеңештин биринчи жыйынынан улам Аль Нахайян жана ал жетектеген делегацияны Анкарада кабыл алгандыгы үчүн кубанычта экенин айтты.
“2023-жылы Абу-Дабиге болгон сапарымда шейх Мохаммед бин Заид менен түзгөн стратегиялык өнөктөштүгүбүз бардык тармактарда жемишин бере баштады. Соодадан, инфраструктурадан энергетикага чейин бардык тармактарда олуттуу ийгиликтерге жетиштик”- деди Эрдоган.
Анын айтымында, Эмираттар Түркиянын Жакынкы Чыгыштагы негизги соода өнөктөшү болуп калды.
“Жакында эле 3 жыл мурун соода-сатыкта 10 миллиард долларга жетебизби деп эсептеп жатканбыз, бирок быйыл 20 миллиард доллардан ашабыз деген үмүттөбүз. Эки тараптын чечкиндүү кадамдары менен эми орто мөөнөттүү 40 миллиард долларга жетебиз деп ишенем. Ушундан улам дагы бир жолу жемиштүү жолугушууну өткөрдүк. Биз мында эки тараптуу маселелерди гана эмес, Түркия жана Бириккен Араб Эмираттарында да кеңири талкууладык. Биз кол кое турган келишимдер аркылуу мамилелерибизди өнүктүрөбүз”,- деп кошумчалады ал.
Түркия менен БАЭнин ортосундагы макулдашуулар коргонуу, инвестиция, технология, энергетика, туризм жана азык-түлүк коопсуздугун камтыйт.
Ал эми Туризм жана мейманкана тармагында кызматташуу меморандумуна, ошондой эле фармацевтика, өнөр жай жана айыл чарбасы боюнча келишимдерге кол коюлду.
Коргонуу тармагындагы жашыруун маалыматты коргоого өзгөчө көңүл бурулуп, илим менен технологиядагы амбицияларды баса белгилеген биргелешкен полярдык изилдөөлөр боюнча уникалдуу келишим түзүлөт.
Ал эми шейх Мохаммед бин Заид Аль Нахайян Түркияда аны жогорку деңгээлде тосуп алгандыгы үчүн абдан кубанычта экенин белгилеп, жолугушуу жакшы жыйынтык бергенин билгиледи.
“Биз бардык тармактарда кызматташуубузду жана тилектештигибизди бекемдеп, боордоштугубузду чыңдап жатабыз”,- деди ал.



















