Словениянын президенти Наташа Пирк-Мусар расмий иш сапары менен Казакстанга келди.
Казакстандын президентинин басма сөз кызматы билдиргендей, Астанада Словениянын президенти Наташа Пирк-Мусар менен казак лидери Касым-Жомарт Токаевдин сүйлөшүүлөрү башталды.
Тараптар соода-экономикалык, инвестициялык, транспорттук жана маданий-гуманитардык чөйрөлөрдө өз ара кызматташуунун негизги маселелерин талкуулашат.
Сапардын алкагында Казакстан-Словения бизнес форуму болору да күтүлүүдө.
Маалым богондой, 2024-жылдын январынан декабрына чейин Казакстан менен Словениянын ортосундагы соода жүгүртүү 105,7 миллион долларды түздү. Бул 2023-жылдын ушул мезгилине салыштырмалуу 5,2%га аз.
Ошол эле учурда Казакстандан Словенияга экспорт 2024-жылы 2,1 эсеге өсүп, 5,7 миллион долларга жеткен.
Эске сала кетсек, Словения президенттери буга чейин Казакстанга 2002-жылдын сентябрында, 2009-жылдын ноябрында жана 2010-жылдын декабрында келишкен.



















