Президент Садыр Жапаров 30-майда, Казакстандын президенти Касым-Жомарт Токаевдин чакыруусу менен «Борбор Азия-Италия» биринчи саммитине катышуу үчүн иш сапары менен Астана шаарына барат.
Бул тууралуу Кыргызстандын президентинин администрациясынын тышкы саясат бөлүмүнүн башчысы Сагынбек Абдумуталип билдирди.
«Саммиттин темасы «Жалпы горизонттор. Глобалдык туруктуулук үчүн Борбор Азия менен Италиянын диалогу» деп аталат.
Саммит Борбор Азия өлкөлөрү менен Италиянын кызматташтыгын өнүктүрүү боюнча пикир алмашуу максатын көздөйт.
Саммитке Борбор Азиянын мамлекет башчылары, ошондой эле Италиянын Министрлер Кеңешинин төрайымы Жоржа Мелонинин катышуусу күтүлүүдө», – деп белгиледи Сагынбек Абдумуталип.
Белгилей кетсек, Казакстан, Кыргызстан, Тажикстан, Түркмөнстан жана Өзбекстандан турган Борбор Азиянын «бешилтиги» башка мамлекеттин башчысы менен жолуккан форматтагы саммиттерди бир нече жылдан бери өткөрүп келет. Ушундай эле жолугушуулар жогорку деңгээлде — Тышкы иштер министрлери же башка ведомстволордун жетекчилеринин катышуусунда да өтүп турат.
Быйыл жайында Астанада Борбор Азия — Кытай саммитин өткөрүү пландалууда, ал эми күзүндө Душанбе шаарында Борбор Азия — Россия саммити болот.



















