Бул дем алыш күндөрү Загребде өткөн жыйында ЕБнин консервативдүү лидерлери Европанын коргонуу мүмкүнчүлүгүн күчөтүү зарылдыгын билдирип, өз алдынча коопсуздук кепилдиктерин иштеп чыгууга макул болушту.
Бул тууралуу Politico өз булактарына таянып кабарлады.
«Ондогон жылдар бою айрым өлкөлөр: “Бизде НАТО бар, эмнеге параллелдүү түзүмдөр керек?” деп айтып келишкен», — деди аты-жөнүн ачыкка чыгарбоону каалаган жогорку даражалуу европалык дипломат.
Анын айтымында, АКШнын президенти Дональд Трамптын Гренландияга байланыштуу коркутууларынын фонунда Европа өз коопсуздугун НАТОго таянбастан, өз алдынча камсыздоонун зарылдыгын сезди.
2009-жылдан бери ЕБ келишиминде 42.7-берене бар, ал уюмга мүчө мамлекеттердин бири кол салууга кабылган учурда өз ара жардам көрсөтүүнү милдеттендирет. Бирок буга чейин ал сейрек колдонулуп келген, анткени ушул сыяктуу максатты НАТОнуӊ 5-беренеси аткарып келген. Эми болсо европалык өкмөттөр АКШнын Европага жардам берүүгө дайыма даяр экенине күмөн санай башташты.
ЕБге мүчө мамлекеттердин лидерлери, анын ичинде Германиянын канцлери Фридрих Мерц, Европанын коопсуздугун өз күчү менен камсыз кылуу зарылдыгын моюнга алышты. Алар азырынча аты аталбаган эки лидерге 42.7-беренени кагаз жүзүндөгү норма эмес, чыныгы коопсуздук кепилдигине айлантуу боюнча ыкчам пландарды иштеп чыгууну тапшырды.
Европалык лидерлер трансатлантикалык мамилелер Трамп бийликке келгенге чейинки абалына кайтып келбеши мүмкүн экенин эскертишүүдө. Алар көрүлүп жаткан чаралар АКШ менен мамилени «үзүүгө» эмес, «тобокелчиликтерди азайтууга» багытталганын белгилешет.















