Орусиянын делегациясы бейшемби күнү Стамбулга барат жана ал жакта Украина тарапты күтөт. Бул тууралуу Россия президентинин басма сөз катчысы Дмитрий Песков ВГТРК телеканалынын журналисти Павел Зарубиндин суроосуна жооп берип жатып билдирди.
Украина президенти Владимир Зеленскийдин Россия лидери менен жолугушуу ниети тууралуу пикирин сураганда, Песков мындай деп жооп берди:
«Биз президент Путиндин билдирүүлөрүнө гана таянабыз. Ал бейшемби күнү Стамбулда делегациялар аралык сүйлөшүү өткөрүүнү сунуштаган. Биздин делегация ошол жакта болуп, Украина тарапты күтөт», — деди Песков.
Ошондой эле ал Орусия делегациясынын курамы президенттин тиешелүү көрсөтмөсүнөн кийин гана жарыяланарын кошумчалады.
Украинадагы кагылышууну жөнгө салуу аракеттери
2022-жылы Россия менен Украина ортосундагы куралдуу жаңжал башталгандан бери тараптар бир нече жолу сүйлөшүү өткөрүүгө аракет кылышкан.
-
Биринчи үч раунд 2022-жылдын 28-февралында Гомелде, 3 жана 7-мартта Брестте өткөн, бирок негизги маселелер боюнча келишимге жетишкен эмес.
-
10-мартта Анталиядагы дипломатиялык форумдун алкагында эки өлкөнүн тышкы иштер министрлери жолуккан, бирок натыйжа болгон эмес.
-
Эң маанилүү сүйлөшүүлөр 29-мартта Стамбулдагы Долмабахче сарайында өткөн. Ал жерде Украина Россияга келишим долбоорун жана кепил болуучу мамлекеттердин тизмесин сунуштаган.
-
Бирок 17-майда Украина расмий түрдө сүйлөшүүлөрдү токтоткон жана 4-октябрда президент Зеленский СНБО чечимине кол коюп, Россия президенти менен сүйлөшүүлөрдү жүргүзүү мүмкүн эместигин жарыялаган.
Дипломатиялык туңгуюкка карабастан, 22-июлда Стамбулда БУУ жана Түркиянын ортомчулугу менен Кара деңиз дан келишимине жетишилген.
2025-жылдын 18-мартында АКШ президенти Дональд Трамп менен Россия президенти Владимир Путиндин телефон аркылуу сүйлөшүүсүнөн кийин, Орусия энергетикалык инфраструктурага чабуул жасоодон баш тартуу демилгесин колдоп, эртеси Зеленский да ушундай эле кадамга барууга макул болгон.
11-майга караган түнү президент Путин алдын ала шартсыз Украина менен түз сүйлөшүү өткөрүүнү Стамбулда сунуштаган.
Түркия президенти Режеп Тайып Эрдоган жолугушууну уюштурууга даяр экенин билдирген. Дональд Трамп Россия президентинин бул сунушун колдоп, Зеленский да 15-майга белгиленген сүйлөшүүгө катышарын ырастаган.
















