Пакистандын аскер-аба күчтөрүнүн Афганистандын Кандагар провинциясындагы чек арага жакын Спин-Булдак районунда жасаган аба соккусунун натыйжасында 40 адам каза болуп, дагы 170 киши жаракат алды.
Бул тууралуу Tolo News агенттиги жергиликтүү бийлик өкүлдөрүнө шилтеме берүү менен билдирди.
Маалыматка караганда, Пакистан тараптан аткылоонун айынан Нокли, Вардак, Кучиан, Шорабак жана Шахид аймактарындагы бир нече турак үйлөр жабыркаган.
Афганистан менен Пакистандын чек арасындагы кырдаалдын курчушу
9-октябрда Афганстандын борбору Кабулда жарылуулар болгон соң, афган бийлиги Пакистанды Марга жана Кабулдагы жардырууларды уюштурду деп айыптаган.
11-октябрда Пакистан менен чек аралаш Пактия провинциясында эки өлкөнүн чек ара аскерлеринин ортосунда катуу атышуулар орун алган.
Афган тараптын маалыматына караганда, бул кагылыштарда 58 пакистандык аскер өлүп, 30у жаракат алган, ошондой эле бир топ курал-жарак жана техника афган чек арачыларынын колуна өткөн. Ошол эле учурда, Афганистан тарап 9 жоокерин жоготконун тастыктаган.
Афган өкмөтүнүн өкүлү билдиргендей, Катар жана Сауд Аравиясынын ортомчулугу менен согуш аракеттери убактылуу токтотулган.
Ал эми Пакистандын армиясы өз билдирүүсүндө 23 аскеринин өлгөнүн, 29унун жаракат алганын, ошондой эле Афган жетекчилигине байланыштуу 200дөн ашык “террористтин” жок кылынганын маалымдаган.
15-октябрда Пакистан менен Афганистан жакынкы 48 саатка ок атышууну токтотуу боюнча убактылуу келишимге жетишкен.



















