Ош шаарынын мэри Жеңишбек Токторбаев калаадагы 9 муниципалдык аймактык башкармалыктардын (МАБ) атын өлкөдөгү 7 облус менен Бишкек жана Ош шаарларынын атына алмаштырууну сунуштады.
Бул тууралуу ал 11-августтагы шаар ичиндеги таңкы рейди учурунда билдирди.
“Эгер шаардын тургундары, депутаттар уруксат берсе, Ош шаарындагы 9 МАБтын атын 7 облустун жана Ош менен Бишкек шаарынын атына берсек деген сунушум бар. Анткени облустардан келген коноктор дагы, мисалы нарындык бир туугандар “Ош шаарындагы 60 миң эли бар муниципалдык аймактык башкармалыкка Нарын обулсунун урматына Нарын деп ат бериптир” деп сүйүнмөк”,-деди Токторбаев.
Ал кошумчалагандай, кайсы облустун аты ыйгарылган МАБты ошол аймактын белгилүү жерлери, каада салтын чагылдырган атайын белгилер менен кооздосо болот. Муну менен ички туризмди өнүктүрсө жана элдин ынтымагын дагы да бекемдөөгө болоорун белгиледи.
“Мисалы, Баткен облусу “Айгүл” гүлү менен белгилүү, айгүл гүлүнүн образын чагылдырыш керек. Нарындын Таш-Рабаттын, Кошой-Коргонун, Чүйдүн Буранасын, Жалал-Абад курортун чагылдырган элесин орнотуп койсок болот”,-деди ал.



















