Ош шаарындагы “Боорукердик” үй-интернатындагы балдардын зомбулукка жана сексуалдык ыдыкка кабылганы боюнча маалыматтар коомчулуктун көңүлүн бурду. Учурда бул факты боюнча шаардык ички иштер башкармалыгы тарабынан териштирүү жүрүүдө. Милициянын басма сөз кызматы тиешелүү адамдар суракка алынып жатканын билдирди.
Бул тууралуу буга чейин 9-апрелде “Балдардын укугун коргоо лигасынын” жетекчиси Назгүл Турдубекова социалдык тармактагы баракчасына жазып чыккан. Анын айтымында, өспүрүмдөр интернаттын тарбиячылары тарабынан ур-токмокко алынганын жана сексуалдык ыдык көргөнүн айтып беришкен.
Маалым болгондой, 2024-жылы Ош шаарындагы “Лотос” балдар үйүнүн имараты авариялык абалга келгендиктен, ал жердеги балдар “Боорукердик” үй-интернатка көчүрүлгөн. Турдубекова балдарды карылар үйүнө жайгаштыруу мыйзамга туура келбей турганын белгилеп, тийиштүү органдарды чара көрүүгө чакырууда.
Ал эми “Боорукердик” үй-интернатынын жетекчилиги укук коргоочунун дооматтарын четке какты.



















