Ооганстандын Бамиан провинциясында, өлкөнүн «картошканын борбору» деп эсептелген аймагында, тажрыйба иретинде 17 гектар жерге жогорку түшүм берүүчү «Фонтане» сортундагы үрөндүк картошка эгилди. Адистер мол түшүм күтүп жатышат.

Кабул шаарында Өзбекстандын делегациясы Бамиан провинциясынын губернатору Аль-Хаж Кари Гүл Хайдар менен жолугушту.
Жолугушууда Бамиан провинциясынын экономикалык жана агрардык мүмкүнчүлүктөрү, айыл чарба тармагындагы келечектүү долбоорлор жана эки тараптуу сооданы кеңейтүү маселелери талкууланды.
Жыйындын жүрүшүндө Бамиандын тоолуу климатынын аркасында ал Ооганстандын «картошканын борбору» катары таанылганы белгиленди. Аймакта тажрыйба иретинде 17 гектар жерге жогорку түшүм берүүчү «Фонтане» сортундагы 44 тонна үрөндүк картошка эгилген. Анын жыйынтыгында мол түшүм алынары күтүлүүдө.

Ошондой эле бул долбоор картошканын түшүмдүүлүгүн жогорулатууга, заманбап агротехнологияларды киргизүүгө жана Өзбекстан менен Ооганстандын айыл чарба тармагындагы кызматташтыгын жаңы деңгээлге чыгарууга багытталганы белгиленди.
Тараптар Бамиан провинциясынан Өзбекстанга жылына 300 миң тоннага чейин сапаттуу картошка экспорттоо мүмкүнчүлүгүн да талкуулашты.
Жолугушуунун жыйынтыгында ишкерлердин түз байланыштарын активдештирүү, өз ара сооданын көлөмүн көбөйтүү жана айыл чарба тармагында жаңы биргелешкен долбоорлорду ишке ашыруу боюнча макулдашууларга жетишилди.


















