Москванын Басман райондук соту 22-марттагы “Крокус Сити Холлдогу” кол салуу боюнча сегизинчи шектүү Алишер Касимовду 22-майга чейин камакка алды. Бул тууралуу сот залынан РИА Новости агенттигинин кабарчысы билдирди.
Касимов сотто батирин “Авито” сервиси аркылуу ижарага бергенин, террорчулардын планы жөнүндө билбегенин айтты.
РИА Новости маалымдагандай, Касимов – теги кыргызстандык Россиянын жараны. Ал жеке ишкер жана кафе иштетип, өзү ошол жерде иштейт. Красногорск шаарына жакын Путилково айылында жашайт. Орто билимдүү, үч баласы бар.
Күн мурун 25-мартта, Басман соту ишке катышы бар деген шек менен Исроил Исломов, анын уулдары Аминчон жана Диловар Исломовдорду 22-майга чейин камакка алган.

Диловар террорчулар кылмыш жасаган жерден качууга аракет кылган Renault үлгүсүндөгү унаанын ээси экенин журналисттер мурдараак жазып чыгышкан. Ал бул автоунааны февраль айында саткан, бирок унаанын ОСАГО камсыздандыруу полиси Исломовдо калып, кайра катталган эмес.
Россиянын Тергөө комитетинин маалыматы боюнча, теракт уюштургандардын бири Шамсидин Фаридуни Аминчон Исломовду кылмыштуу топтун катарына ушул жылдын январына чейин, ал эми Диловар Исломовду 2024-жылдын 11-мартына чейин аралаштырган.
“Крокус сити холлдогу” теракт
Москва облусуна караган Красногорск шаарындагы “Крокус сити холл” концерттик залына кол салуу 22-март күнү кечинде болгон. Имаратка куралчан төрт адам кирип келип, ал жердеги адамдарды аткылап, бир нече жерге от коюшкан.
Тергөө комитетинин төрагасы Александр Бастрыкиндин айтымында, 139 адам каза таап, 182си жарадар болгон.
Кылмыш иши “теракт” беренеси боюнча козголгон.
Теракт жасаган кылмышкерлердин баары 23-март күнү эртең менен Брянск облусунда кармалган. Алар Тажикстандын жарандары Далержон Мирзоев, Саидакрами Рачабализода, Шамсидин Фаридуни жана Мухаммадсобир Файзов болуп чыккан. ФСБнын маалыматы боюнча, террордук чабуулга шектелип жалпы 11 киши кармалган.

Дүйшөмбүгө караган түнү Москванын Басман соту аларды 22-майга чейин камакка алуу чечимин чыгарган. Аларга уюшкан топтун курамында адам өлүмүнө алып келген теракт жасаган деген айып тагылды.


















