Ушул жуманын башында Москва шаарындагы ТАСС агенттигинде БРИКСтин Адабият сыйлыгы расмий түрдө тааныштырылды. Бул сыйлыкка «элдин жан дүйнөсүн эң жакшы чагылдырган» авторлор катыша алышат. Сыйлыктын байге фонду — 1 миллион рубль. Бул сыйлык жыл сайын тапшырылары пландалып, гуманитардык кызматташтыкты жана маданияттар аралык диалогду өнүктүрүүгө өбөлгө түзмөкчү.
Калыстар тобуна Бразилия, Индия, Кытай, Түштүк Африка Республикасы, Бириккен Араб Эмираттары, Иран, Эфиопия, Египет жана Индонезиядан өкүлдөр кирет. Россиядан калыстар тобуна төмөнкү өкүлдөр кирди: Мамлекеттик адабият музейинин директору Дмитрий Бак, Россия мамлекеттик китепканасынын директору Вадим Дуда, Чет өлкөлүк адабият китепканасынын директору Марина Захаренко, котормочу Александр Ливергант, жазуучу Захар Прилепин жана «Котормо институту» АНОнун директору Евгений Резниченко.
Россиялык китеп союзунун президенти жана сыйлыкты уюштуруу комитетинин мүчөсү Сергей Степашин сыйлыктын максаты тууралуу мындай деди:
«Сыйлыктын максаты – бирдиктүү гуманитардык мейкиндикти түзүү. Китеп ар бир өлкөнүн маданиятын тереңирээк таанып-билүүгө жол ачат».
Сыйлыкка жазуучуларды улуттук калыстар тобу сунуштайт. Ар бир өлкө улуттук адабиятка өзгөчө салым кошкон үч жазуучуну көрсөтө алат. Булардын негизинде узун тизмек түзүлөт — ал Бразилияда жарыяланат. Кыска тизмек Шанхайда белгилүү болот, ал эми жеңүүчүлөрдү сыйлоо аземи күзүндө Россияда өтөт.



















