Индияга болгон сапары учурунда Владимир Путин Кремль тарабынан каржыланган пропагандисттик медиатоптун жаңы англис тилдүү бөлүмү — регионалдык RT India телеканалынын ишке кирүүсүнө старт берди.
«Мен чын көңүлүмдөн үмүттөнөм, Russia Today заманбап Ресияны гана көрсөтпөстөн, биздин кызматташтыктын негизги маселелери боюнча коомубузга багыт табууга көмөктөшөт», — деди ал телеканалдын ишин ачып жатып.
RTнын башкы редактору, пропагандист Маргарита Симоньян презентациянын жүрүшүндө Индияны «достук жана меймандос өлкө» деп атап, Украинага аскердик операция башталгандан кийин RTнин көрсөтүүсүнө тыюу салынган же чектелген Батыш мамлекеттери менен салыштырды.
2022-жылдан кийин RT America АКШдагы көптөгөн кабелдик жана спутниктүү операторлордун тармактарынан жоголгон, ал эми Европалык комиссия Кремлдин таасир көрсөтүү кампанияларына байланыштуу тынчсызданууларды себеп кылып, RT жана ага байланыштуу Sputnik телеканалдарынын ЕБ аймагындагы көрсөтүүлөрүн токтоткон. Путин бул чечимдерди сынга алып, Батыш өкмөттөрү «чындыктан коркуп жатышат» деп айткан жана RTни «Россиянын позициясын илгерилеткен эффективдүү канал» деп мүнөздөгөн.
RT India телеканалынын ишке кириши өлкө боюнча кеңири жарнамалык кампания менен коштолду. Промо-материалдарга билборддор, санариптик жарнама, Делидеги тематикалык поезд, Мумбайдагы Бандра-Ворли көпүрөсүнө жасалган жашыл жарык проекциясы жана Нью-Делидеги матрёшка стилиндеги студия ишке кирди. Дебюттук видеодо телеканал жаңы студияны баса белгилеп, индиялык жана советтик лидерлердин эки тараптуу тыгыз мамилелер жөнүндөгү сөздөрүн пайдаланган.


















