Беларусь президенти Александр Лукашенко АКШ президенти Дональд Трамптын атайын өкүлү Жон Коул менен жолугушканын БелТА маалымдады.
«Мен жакында Трампты угуп, түшүнгөнүмдөй, бул сиздин сунушуңуз болушу мүмкүн, аны абдан тынчсыздандырган маселе — ал айткандай, барымтадагыларбы же кимдер… саясий туткундарбы жана башка маселелер экен. Мен каршы эмесмин. Келгиле, бул теманы да глобалдуу талкуулайлы», — деди Лукашенко.
Ал ошондой эле АКШ менен «глобалдуу келишим» түзүүгө даяр экенин билдирди. «Мырза Трамп жакшы көргөндөй — чоң келишимди» иштеп чыгуу мүмкүнчүлүгүн карап көрүүгө даярбыз», — деп кошумчалады ал.
Лукашенко белгилегендей, Европа өлкөлөрүнө чыгып кеткен айрым белорус эмигранттары бул темага «таандык болууну» каалашат. «АКШ каалаган тарап менен сүйлөшсө болот, бирок көп пикир келишпестиктер бар болгондуктан, бул маселени чогуу талкууласак туура болот», — деди ал.
Беларусь лидери андан ары мындай деди: «Биз бул адамдардын колонияларда отуруусуна таптакыр каршыбыз. Андан тышкары, алар саясат үчүн соттолгон эмес. Бизде мындай беренелер жок. Эгер Дональд кызыкса (балким анча эмес), биз ар бир адам боюнча кылмыштарынын маңызын көрсөтүп бере алабыз».
Эскерте кетсек, Лукашенко 15-августта Трамп менен телефон аркылуу сүйлөшүп, камактагылардын маселесин талкуулаган. Андан кийин Трамп Truth Social тармагында Беларуста 1300 адамдын жакында бошотуларына үмүт артарын жазган. Лукашенко болсо бул чакырууга жооп берип, «кааласаңар, аларды өзүңөргө алып кеткиле» деп айткан жана аларды «бандиттер» деп атаган.
2020-жылдагы президенттик шайлоодон кийинки нааразылык акцияларына байланыштуу миңдеген кылмыш иштери козголгон. Айрым оппозиция лидерлери ар кандай мөөнөттөргө кесилип, айрымдары, анын ичинде Светлана Тихановская чет өлкөгө чыгып кетишкен. Акыркы эки жылда Лукашенко бир нече ондогон адамдарды ырайымдуулук кылып бошоткон. Мисалы, 21-июнда Светлана Тихановскаянын күйөөсү Сергей Тихановский эркиндикке чыккан. Бул Лукашенко менен Трамптын атайын өкүлү Кит Келлогдун сүйлөшүүсүнөн кийин болгон.
Rzeczpospolita жазгандай, Минск жана Вашингтон сүйлөшүүлөрдү улантып жатышат. Белорус тарап 1300гө жакын адамдын «көпчүлүгүн» бошотууга даяр экенин билдирип, мунун ордуна АКШ санкцияларын жумшартуусун көздөйт.


















