Лихачёв: «Росатом» технологиялык жактан Ирандан уранды алып чыгууга даяр.
«Росатом» жогорку байытылган уранды Ирандан алып чыгууга технологиялык жактан даяр, бул иштин параметрлерин Ирандын жетекчилиги аныкташы керек, деп билдирди Россиянын «Росатом» мамлекеттик корпорациясынын башкы директору Алексей Лихачёв.
«Биз бүгүн ар кандай форматта сүйлөшүүлөр жүрүп жатканын жана жогорку байытылган уран продукциясынын тагдыры боюнча ар кандай сценарийлер талкууланып жатканын түшүнөбүз… Россиянын Иранга ушундай эле кырдаалда жардам берүү тажрыйбасы бар… он жыл мурда. Ошол тажрыйбага таянып, биз бул ишти аткарууга даярбыз», — деди ал журналисттерге.
Лихачёв белгилегендей, бул иштин параметрлерин «биринчи кезекте Ирандын жетекчилиги аныктайт».
«Бардык сүйлөшүүлөрдү эске алуу менен, эртеби-кечпи Ирандагы байытылган урандын тагдыры боюнча чечим кабыл алынат. Биз өз тарабыбыздан ирандык атом адистери жана Иран эли менен өнөктөштүк духунда технологиялык жактан каалаган маселени чечебиз», — деп кошумчалады «Росатомдун» башчысы.














