Пекин шаарындагы Тяньаньмэнь аянтында Экинчи дүйнөлүк согуштун аякташынын жана андагы Жеңиштин 80 жылдыгына арналган масштабдуу аскердик парад өттү.
Парадга чет өлкөлөрдүн 20дан ашуун мамлекет жана өкмөт башчылары, ошондой эле 50 миңден ашык көрүүчүлөр катышышты.
Аскердик парадга Кытайдын төрагасы Си Цзиньпин старт берди. Жүрүштүн башында мамлекеттик тууларды көтөргөн аба эшелондору учуп өттү. Андан кийин жөө аскерлердин параддык бөлүктөрү, аскердик желектерди алып жүргөн бөлүктөр жана Кытайдын аскердик техникаларынын колонналары өтүштү. Парад аскердик учактардын эскадрильясынын учуусу менен аяктады.
Кытайдын япон агрессиясына каршы согушу 1931-жылы япон армиясынын Маньчжурияга басып кириши менен башталган. 1937-жылы алар кеңири масштабдуу чабуулга өтүп, кармаш катуулап, кийинчерээк Экинчи дүйнөлүк согуштун бир бөлүгүнө айланган. Алгачкы этапта СССР Пекинге олуттуу экономикалык, техникалык жана согуштук жардам көрсөткөн. Кытайда 3,5 миңден ашык советтик ыктыярчылар салгылашкан. Расмий маалыматтар боюнча, алардын 211и каза болгон. 1945-жылдын августунда советтик-монголдук аскерлердин күч-аракети Квантун армиясын талкалоого жана Кытайдын түндүк-чыгышын япондук аскерлерден бошотууга жетишкен. Кытай япониялыктар менен кагылышууда 35 миллиондон ашуун кишисинен ажыраган. 2014-жылы Кытай бийлиги 3-сентябрды расмий улуттук майрам катары таануу чечимин кабыл алган. 2015-жылы Тяньаньмэнь аянтында биринчи жолу мааракелик датага арналган масштабдуу аскердик парад өткөн.

































Discussion about this post