Кытай Украинада өз жарандарын тыңчылык айыбы менен кармоо маселесин иликтеп жатат. Бул тууралуу Кытай Эл Республикасынын Тышкы иштер министрлигинин расмий өкүлү Мао Нин маалымат жыйынында билдирди, деп жазат РИА Новости.
«Биз жагдайды иликтеп жатабыз. Эгерде бул иш Кытай жарандарына тиешелүү болсо, анда алардын мыйзамдуу укуктарын жана кызыкчылыктарын коргойбуз», — деди ал.
Украинанын коопсуздук кызматынын маалыматына ылайык, кармалгандар — Киевдеги техникалык жогорку окуу жайларынын биринде окуган 24 жаштагы мурдагы студент жана анын атасы. Атасы Кытайда жашап, Украинага маал-маалы менен келип турган. Экөөнө тең «тыңчылык» беренеси боюнча айып тагылган. Эгер күнөөлөрү далилденсе, алар 15 жылга чейин эркинен ажыратылышы мүмкүн, мүлкү да конфискацияланат.
9-июлда Украинанын коопсуздук кызматы Киевде эки Кытай жараны кармалганын кабарлаган. Алар Украинадагы «Нептун» ракеталык комплекси боюнча жашыруун маалыматтарды уурдап, өлкөдөн чыгарып кетүүгө аракет кылышкан деп шектелүүдө.
Мындан мурун да Европа Комиссиясында иштеген котормочу айымды шектүү катары карап, ал Украина президенти Владимир Зеленский катышкан сүйлөшүүлөрдү жашыруун түрдө жазды деген жүйө менен ведомствого кирүү укугунан ажыратышкан.
Ошондой эле, түрк блогери Украинанын аймагына кире албай калган — ал да Россиянын кызыкчылыгы үчүн тыңчылык кылган деп шектелген.


















