Кыргызстан Россиядан С-300 зениттик-ракеталык комплекстеринин партиясын алды.
Бул тууралуу Кыргызстандын Коопсуздук кеңешинин катчысы Марат Иманкулов билдиргени россиялык “Известия” басылмасы маалымдады.
“Бизде бирдиктүү абадан коргонуу системасы иштеп жатат. Бизге азыр бул биргелешкен системанын С-300 деген элементтери келди. Алар өлкөнүн аймагына алып келинди”, – деди ал.
Иманкулов өлкөгө канча комплекс берилгенин айткан жок.
Коопсуздук кеңешинин катчысы комплексти Бишкекте 8-майда Улуу Ата Мекендик согуштагы Жеңиштин 80 жылдыгына арналган парадда көрүүгө болот деген үмүтүн билдирди.
Белгилей кетсек, буга чейин Токмок шаарында Улуу Ата Мекендик согуштагы Жеңиштин 80 жылдыгына арналган параддын машыгуусу өткөн. Коргоо министрлиги парадга 120дан ашык аскердик жана атайын техника, анын ичинде оор бронетехника, артиллерия, абадан коргонуу системалары жана авиация катышарын билдирген.
Кыргызстан менен Россиянын ортосундагы “Абадан кол салуудан коргонуу боюнча биргелешкен региондук системаны түзүү жөнүндөгү” келишим 2023-жылдын ноябрында күчүнө кирген. Макулдашууга тараптар 2022-жылдын августунда Москвада кол коюшкан. Ага ылайык, Кыргызстан Россияга Канттагы авиабазанын жанындагы беш гектар жер тилкесин убактылуу пайдаланууга берет. Россия тарап ал жерге Кол салуудан коргонуу бөлүгүн жайгаштырат. Абадан кол салуудан коргонуу бөлүктөрүн кыргыз тарап башкара турганы, ошол эле учурда күнүмдүк ишинде каржылык, материалдык-техникалык камсыздоо жана башка иш-чаралар, бөлүктөр Россия өкүлүнүн карамагында болору айтылган.



















