Өзбекстандын Самарканд шаарында Кыргызстандын Жогорку Кеңеши менен Өзбекстандын Олий Мажлиси ортосундагы кызматташтык боюнча парламенттер аралык комиссиянын V жыйыны өттү.
Бул тууралуу Ташкенттеги Кыргызстандын дипломатиялык өкүлчүлүгүнүн басма сөз кызматы маалымдады.
Жолугушууда кыргыз-өзбек мамилелеринин учурдагы деңгээли жана өнүгүү келечеги талкууланып, эки тараптуу кызматташуунун маанилүү инструменттеринин бири катары парламенттер аралык кызматташтыкты бекемдөөгө өзгөчө көңүл бурулду.
Иш чаранын катышуучулары эки өлкөнүн ортосундагы соода-экономикалык мамилелерди тереңдетүү, инвестиция тартуу жана маданий-гуманитардык алакаларды активдештирүү үчүн парламенттик дипломатияны кеңири колдонуу мүмкүнчүлүгүн талкуулашты.

КРнын Жогорку Кеңешинин төрагасынын орун басары Нурланбек Азыгалиев белгилегендей, кыргыз-өзбек стратегиялык өнөктөштүгү – эки коңшу мамлекеттин ийгиликтүү кызматташуусунун үлгүсү болуп саналат.
«Кыргызстан менен Өзбекстан жөн гана коңшу өлкөлөр эмес. Бүгүнкүдөй жогорку деңгээлдеги бир туугандык мамилелер эки тараптын саясий жетилгендигинин жана жогорку деңгээлдеги натыйжалуу башкаруунун натыйжасы», – деди ал.
Н. Азыгалиевдин айтымында, комиссиянын ар жыл сайын өтүп турган жыйындары эки өлкөнүн парламенттерине өз ара маселелер боюнча үзгүлтүксүз пикир алмашууга, аларды биргелешип чечүүнүн жолдорун иштеп чыгууга жана тиешелүү комитеттер менен депутаттык топтордун ортосунда туруктуу иш байланыштарын түзүүгө өбөлгө болууда.
Ал эми Олий Мажлис Сенатынын төрагасынын биринчи орун басары Садык Сафоев эки өлкөнүн башчыларынын саясий эркинин аркасында Кыргызстан менен Өзбекстан акыркы жылдары өз ара ишенимдин бекем пайдубалын түзгөнүн баса белгиледи.
Анын айтымында, парламенттик дипломатия түз жана конструктивдүү диалогго, мыйзам чыгаруу ишмердүүлүгүндө тажрыйба алмашууга кеңири мүмкүнчүлүктөрдү ачып, ошондой эле ар кыл багыттагы демилгелерди алдыга жылдырууга өбөлгө түзөт.
Парламентарийлер эки тараптуу өнөктөштүктү мындан ары тереңдетүүнү бир добуштан колдой тургандыктарын билдиришти жана Өзбекстан менен Кыргызстандын элдеринин жакшы коңшулаштыктын жана кызыкчылыктарын коргоонун натыйжалуу механизми катары парламенттер аралык диалогду өнүктүрүүгө даяр экендиктерин баса белгилешти.


















