Келечекте Кыргызстандан чыгарылган унаалар дүйнө жүзүнө экспорттоло баштайт.
Кыргызстан менен Өзбекстандын биргелешкен унаа чыгаруучу завод куруу жөнүндө келишими ишке ашып жатат. Бул тууралуу бүгүн, 22-январда маалымат жыйынында экономика жана коммерция министри Данияр Амангелдиев билдирди.
Анын айтымында, аталган заводдо быйылкы жылдын биринчи жарым жылдыгынын аягында алгачкы унаалар чыгарыла баштайт.
“Барыбызга белгилүү болгондой завод куруу үчүн Сокулук районунан жер бөлүнүп берилген. Азыркы учурда заводду куруу иштери аягына чыгып жатат жана 2024-жылдын биринчи жарым жылдыгынын аягына чейин завод ишке киргизилип, алгачкы унаалардын өндүрүлүшү күтүлүүдө. Келечекте дүйнөдө экспорттолгон жана реэкспорттолгон унаалардын кандайдыр бир бөлүгүн биздин өлкөдөн чыгарылган унаалар ээлейт деп ойлойбуз”, – деди министр.
Белгилей кетсек, өткөн жылы Өзбекстандын президентинин Кыргызстанга иш сапарынын алкагында эки өлкөнүн ортосунда автоунаа жана коммерциялык техникаларды чыгарууну уюштуруу боюнча кызматташууга келишим түзүлүп, документке Кыргызстандын министрлер кабинети жана Өзбекстандын өкмөтү кол койгон.
Экономика министринин орун басары Айнура Үсөнбекова мындан мурда Жогорку Кеңеште эгер завод ишке киргизилсе, 2000дей жаңы жумуш орундары түзүлөрүн билдирген.
“Жалпы долбоор боюнча унаалардын 19 модели белгиленген. Анын ичинен жети модель коммерциялык багытта болот. Биринчи Chevrolet Cobalt үлгүсүндөгү унаа чыгарылат. Эгер мыйзам долбоору ратификациядан өтсө, кийинки жума заводдун курулушу башталат. Ал эми ушул жылдын июнь айында завод ишке киргизилип, жылдын аягына чейин 600 жеңил унаа жана 50 жүк ташуучу унаа чыгарылат”, — деп кошумчалаган экономика жана коммерция министринин орун басары.
Заводду Кыргызстандын «Нур» жана «ДТ Техник» ишканалары, ошондой эле «Узавтосаноат» ишканасы иштетет.
















