Кыргыз-казак чек араларында жайгашкан “Кең-Булуң”, “Ак-Тилек”, “Чалдабар”көзмөл-өткөрүү постунда кезекте турган оор жүк ташуучу унаалардын айдоочуларын ар тараптуу жардам көрсөтүү максатында ӨКМдин Чүй облусу боюнча башкармалыгынын адистери атайы нөөмөттө турушат.
Жергиликтүү айыл өкмөттөр менен биргеликте ысык тамак жана суусундуктар менен камсыз кылып беришүүдө.
Бул тууралуу ӨКМдин маалымат кызматы билдирди.
Эске сала кетсек, үстүбүздөгү жылдын 22-августунан тартып кырдаалга байланыштуу абал турукташканга чейин Бишкек – Нарын – Торугарт унаа жолунда ӨКМдин Чүй облусу боюнча башкармалыгынын адистери кызматкерлери чатырларды тигишкен.
КР Улуттук коопсуздук мамлекеттик комитетинин Чек ара кызматынан билдиришкендей, 24-август саат 12:00гө карата кыргыз-казак чек арасындагы 4 өткөрүү пунктунда жүк ташуучу унаалардын төмөндөгүдөй узун кезеги пайда болду:
— “Ак-Тилек-автожол” көзөмөл өткөрүү жайында — 379;
— «Чалдыбар-автожол» КӨЖда — 73;
— «Кен-Булун-автожол» КӨЖда — 89;
— «Чон-Капка-автожол» КӨЖда -73.
Белгиленгендей, кыргыз тараптан өткөрүү жайлары күнүмдүк тартипте иштеп жатат.
Мындан мурда “Ак-Тилек-автожол” көзөмөл-өткөрүү жайынын алдында жардам көрсөтүү жай катары чатырлар тигилген. Ал жактарда айдоочуларга жана жүк ташуучуларга медициналык, психологиялык жактан жардам жана кеңеш берилип, ысык тамак уюштурулган.
Ошол эле учурда КР Айыл чарба министрлигинин сугат тармактары боюнча илимий-изилдөө институтунун директору, экономика илимдеринин доктору Улан Чортомбаев Facebook баракчасына казак тарап аларды суу менен камсыз кылуунун үзгүлтүккө учурашына байланыштуу Кыргызстандан келген унааларды өткөрбөй жатканын айтып, казак бийлигине кайрылуу жасаган.
Бирок, КР Айыл чарба министрлигине караштуу Суу чарба кызматынын директору Алмазбек Сокеев бүгүн Бишкекте өткөн маалымат жыйынында Киров суу сактагычынан суу берүү токтотулгандан кийин казак тараптын Кыргызстанга дооматы жок экенин билдирип, бул кечээ эки тараптуу телефондук сүйлөшүүлөрдө тастыкталганын айтты.
