Орточо эсеп менен Севастополь шаарындагы май куюучу жайларда бензиндин баасы литрине 199 рублга жетти. Ал эми жалпы Крым боюнча бензиндин баасы 185–200 рублдун тегерегинде болууда. Бул тууралуу “Коммерсантъ” басылмасы маалымдады.
Басылманын жазганына караганда, камсыздоо жолдору үзгүлтүккө учураган Крымда күйүүчү май тартыштыгы күчөп, май куюучу жайларда эң катуу чектөөлөр киргизилген. Жеке адамдарга бир жолку куюуда 20 литрден ашык бензин алууга тыюу салынган. Ал эми Севастополдо күйүүчү майды QR-код аркылуу гана куюуга болот. Мындай коддорду мамлекеттик Мах мессенджери аркылуу гана алуу мүмкүн.
«Коммерсанттын» маалыматына ылайык, Крымдагы айрым май куюучу жайлар күйүүчү май сатууну алдын ала эскертүүсүз кыска убакытка гана ачып, бааларды электрондук тактага көрсөтүшпөйт. Натыйжада адамдар аптаптуу ысыкта сааттап кезекте турушат. Кара базарда жана ортомчулар аркылуу бензиндин литри 250–400 рублга чейин сатылууда.
Ошол эле учурда Росстат мындай бааларды каттаган эмес. Мекеменин маалыматына ылайык, 23–29-июнь аралыгында Крымда АИ-92 үлгүсүндөгү бензиндин орточо баасы литрине 81,08 рубль, ал эми АИ-95 үлгүсү 88,82 рубль болгон.
Севастополдо болсо, Росстаттын маалыматы боюнча, бир жуманын ичинде АИ-92 бензининин баасы 30% өсүп, литри 97,95 рублга, ал эми АИ-95 үлгүсү 129,68 рублга жеткен.
Жалпысынан Россия боюнча акыркы бир жумада бензиндин баасы 1,6% жогорулаган. Июнь айынын башынан бери өсүш 6,7% түзүп, бул 2009-жылдан берки эң жогорку көрсөткүч болуп калды. Бир жылдык инфляциялык өсүш дээрлик 20%га жетип, акыркы 16 жылдагы эң жогорку деңгээл катары бааланууда.
Крымдан тышкары бензиндин орточо баасы литрине 80 рублдан ашкан аймактардын катарына Воронеж облусу, Кабардин-Балкар Республикасы, Тюмень облусу, Якутия, Забайкалье крайы, Камчатка крайы, Сахалин облусу жана Магадан облусу кирген.
Ал эми Чечен Республикасы менен Дагестан Республикасында бензиндин орточо баасы литрине 93–94 рублга жетсе, Тыва Республикасында бул көрсөткүч 103 рублду түзгөн.
Акыркы эки айда Россиядагы эң ири мунай иштетүүчү 10 заводдун тогузу соккуларга кабылган соң, бензин рыногу экиге бөлүнгөн. Ири мунай компанияларынын май куюучу жайлары бааларды кризиске чейинки деңгээлге жакын кармап жатса, жеке менчик тармактарда бензиндин литри 120–140 рублга чейин жеткен.
Мунай базаларындагы дүң баалар АИ-92 бензини үчүн литрине 114–118 рубль, ал эми АИ-95 үчүн 125–128 рубль деңгээлинде сакталууда.
Июнь айында Россиядагы мунай иштетүүнүн көлөмү суткасына болжол менен 4 миллион баррелге чейин төмөндөп, бул 2000-жылдардын башынан берки эң төмөнкү көрсөткүч болду.
Тармактагы булак «Коммерсантка» билдиргендей, июль айында мунай иштетүүчү заводдордун жүктөмүн көбөйтүү мүмкүнчүлүгү аз. Анын айтымында, жаңы соккулар болбосо, эң жакшы учурда өндүрүш июнь айындагы деңгээлде гана сакталат.


















