Өзбекстандын, Тажикстандын, Россиянын, Индиянын жана башка өлкөлөрдүн жарандары менен катар кыргызстандыктар да Казакстандын клиникаларына медициналык жардам сурап көп кайрылышууда.
Бул тууралуу Казакстандын саламаттыкты сактоо министрлигинин Медициналык жардамды уюштуруу департаментинин билдирүүсүнө таянып Tengrinews.kz жазды.
Мекеменини маалыматы боюнча, медициналык туризмдин негизги багыттары медициналык жардамдын жогорку технологиялык түрлөрү нейро, кардиохирургия, онкология, травматология жана ортопедия бойдон калууда.
Мындан тышкары, репродуктивдүү технологиялар, анын ичинде экстракорпоралдык уруктандыруу, стоматологиялык жана косметикалык процедуралар тармагындагы кызматтарга суроо-талап жогору.
Маалыматта белгиленгендей, көбүнчө чет элдиктер Астанада, Алматыда, Шымкентте жана квалификациялуу кадрлар менен толукталган ири областтык борборлордо дарыланышат.
Чет өлкөлүк бейтаптар үчүн бардык медициналык кызматтар акы төлөнүүчү негизде гана көрсөтүлөт.
Жыл сайын Казакстанга 45 өлкөдөн 10 миңден ашык медициналык турист келет.



















