Казакстандын борбору Астанада өлкөнүн биринчи президенти Нурсултан Назарбаевдин демилгеси менен курулган башкы мечитке расмий түрдө «Нұрсұлтан мешіті» («Нурсултан мечити») деген аталыш берилди. Бул тууралуу Казакстандын Мусулмандарынын дин башкармалыгынын басма сөз кызматы билдирди.
ТАСС агенттигинин маалыматына ылайык, Астанадагы республикалык башкы мечитке расмий түрдө «Нурсултан» деген ат ыйгарылып, жаңы аталыш расмий колдонууга киргизилди.
«Казакстандын Мусулмандарынын дин башкармалыгы республиканын башкы мечитине “Нурсултан мешіті” деген аталыш берилгенин маалымдайт», — деп айтылат мекеменин билдирүүсүндө.
Дин башкармалыгынын өкүлдөрү белгилегендей, мечит жаңы аталыш менен да элдин руханий турмушуна кызмат кылып, коомдогу ынтымак менен биримдикти чыңдоого салым кошууну улантат.
Мечиттин курулушу 2019-жылы Нурсултан Назарбаевдин демилгеси менен башталган. Ал эми анын салтанаттуу ачылышы 2022-жылы өткөн. Ошол учурда мамлекеттин мурдагы башчысы президенттик кызматтан кетерден бир күн мурун мечиттин пайдубалына алгачкы ташты өзү койгонун белгилеген.
Бул мечит дүйнөдөгү эң ири мечиттердин бири болуп эсептелет. Анын жалпы аянты 10 гектарды түзөт. Комплекс бир учурда 235 миң адамды кабыл ала алат, ал эми башкы күмбөзүнүн бийиктиги дээрлик 90 метрге жетет. Мечиттин ичинде окуу класстары, телестудия, музей жана нике кыюу залдары жайгашкан.
Буга чейин маалымдалгандай, Казакстандын президенти Касым-Жомарт Токаев Нурсултан Назарбаевди 85 жылдык мааракеси менен куттуктаган.
Июль айынын башында мамлекет башчысы өлкөнүн тарыхында жаңы доор башталганын билдирген.



















