Казакстанда 13-14-март күндөрү өлкөнүн президенти Касым-Жомарт Токаевдин катышуусунда Улуттук Курултайдын IV сессиясы өттү.
Улуттук Курултайдын IV жыйынына президент, Мажилистин жана Сенаттын төрагалары, өкмөт мүчөлөрү, депутаттар жана улуттук комиссиянын мүчөлөрү катышты.
Бул маалыматты Zakon.kz агенттиги жазды.
Курултайда Касым-Жомарт Токаев өлкөнүн ички маселелерине көңүл буруу зарылдыгын билдирди.
Ал улуттук биримдиктин, ашынган көз караштарды четке кагуунун жана глобалдык чакырыктарга даярдануунун маанилүүлүгүн белгиледи.
Ошондой эле мамлекет башчысы казакстандыктарды ички күн тартибине жана улуттук биримдикти чыңдоого көңүл бурууга чакырып, өлкө салттуу жана заманбап баалуулуктарды тең салмактап, саясий прагматизмди көрсөтүп, ашынган көз караштардан, тарыхый таарынычтардан жана көз каранды мамилелерден баш тартуусу керектигин билдирди.
Мамлекет башчысы негизги милдет Казакстанды дүйнөлүк өзгөрүүлөргө даярдоо экенин кошумчалап, бул туруктуулукту, стратегиялык көз карашты жана социалдык биримдикти талап кылаарына токтолду.
“Эч ким Казакстанды өнүккөн жана гүлдөгөн мамлекет кыла албайт, биздин өлкө бизге, анын жарандарына гана керек. Биз өзүбүздүн күчүбүзгө жана мүмкүнчүлүктөрүбүзгө гана таянышыбыз керек, – деди Токаев.
Ал белгилегендей, геосаясий туруксуздуктун шартында улуттук биримдикти жана ынтымакты сактоо өзгөчө маанилүү, анткени алар өлкөнүн туруктуу өнүгүүсүнүн негизи болуп саналат.



















