Казакстандын бийлиги өлкөгө океанга түз чыгуу мүмкүнчүлүгүн берген Афганистандагы темир жолдун курулушун баштоону пландап жатат. Биринчи этапта долбоорго 500 миллион доллар инвестиция салуу көздөлүүдө.
Казакстан 500 миллион долларды Трансафган темир жолунун курулушуна жумшай турганын бүгүн вице-премьер Серик Жумангарин билдирди.
«Баарына белгилүү: бизге деңиздерге жана портторго чыгуу жолу керек, бул бүгүнкү күндө өтө маанилүү. Мындай темир жолдун жоктугунан биз кыйналып жатабыз. Мындан ары өнүгүү тууралуу сөз кылуу да татаал. Ошондуктан биз бул ишти жасайбыз жана эртеби-кечпи максатыбызга жетебиз», — деди Серик Жумангарин.
Вице-премьер түшүндүргөндөй, жаңы транспорттук байланыш Казакстанга Пакистандын портторуна чыгууга жол ачат, деп жазат Sputnik Казахстан. Жакынкы келечекте бул темир жол магистралы түштүккө, Аравия деңизи жана Инд океанына жүк ташуу үчүн эң кыска багытты камсыз кыла турган трансулуттук коридордун негизги бөлүгүнө айланышы күтүлүүдө.



















