Казакстандык адистер Иордания аймагындагы уран кендерин иштетет.
Бул тууралуу республиканын “Самрук-Казына” Улуттук жыргалчылык фондунун башчысы Нурлан Жакупов билдиргенин Sputnik Казакстан сайты жазды.
Анын айтымында, фонддун компаниялар тобу бул багытта Иордания падышалыгы менен иш алып барууда.
“Бүгүн Иордания падышасы Абдалла IIнин сапарынын алкагында биздин “Казатомпром” компаниябыз менен иорданиялык “Jumco” улуттук уран компаниясынын ортосунда биргелешкен кооперация боюнча келишимге кол коюлат”, — деди ал.
Жакупов белгилегендей, бул юридикалык жактан милдеттендирген документ болуп эсептелет жана ага ылайык 2026-жылдын аягына чейин Иордания аймагындагы уран кендерин иштетүү үчүн биргелешкен ишкана түзүү пландалууда.
“2026-жылга чейин Иорданияда уранды бөлүп алуу жана байытуу мүмкүнчүлүгүн аныктоо боюнча тажрыйбалык-өндүрүштүк жана изилдөө иштер жүргүзүлөт”, — деп кошумчалады фонд башчысы.
Эгер жыйынтыктар оң болсо, 2026-жылдын аягына чейин эки өлкө биргелешкен ишкана түзөт, анын 70% “Казатомпромго”, ал эми 30% “Jumco” компаниясына тиешелүү болот.
Белгилей кетсек, Иорданиянын падышасы Абдалла II бен аль-Хусейн 26-августта Астана шаарына сапар менен келди. Сапардын алкагында өлкө президенти Касым-Жомарт Токаев менен сүйлөшүүлөрдү өткөрөт жана казакстан-иорданиялык бизнес-форумга катышат.



















