Түркиянын президенти Режеп Тайып Эрдоган Израилдин премьер-министри Биньямин Нетаньяхунун жана Коргоо армиясынын (ЦАХАЛ) Газа секторундагы аракеттери Гитлердин кылмыштарынан ашып кеткенин билдирди.
Бул тууралуу Эрдоган Х социалдык тармактагы баракчасында жазган.
“Нетаньяху жана анын өлтүргүчтөр тармагы варвардык боюнча Гитлерден да ашып кетишти. Европадагы Холокост маалында да Газадагыдай адамгерчиликсиз көрүнүштөр болгон эмес,” — деп белгиледи түрк лидери.
Түрк лидери ошондой эле эл аралык коомчулукту ырайымсыздыкка көз жумбоого жана палестиналыктардын ачарчылыктан массалык өлүп жатканына реакция жасоого чакырды.
Буга чейин палестиналык ХАМАС кыймылы Газа секторунда 2 миллиондон ашуун адам ачарчылык коркунучунда турганын билдирген.
Жакынкы Чыгыштагы абал 2023-жылдын 7-октябрынан тартып курчуп кеткен. Ошол күнү ХАМАС Газадан Израилге кирип барып, чек ара аймактарындагы тургундарды барымтага алып кетишкен. Жооп катары Израиль Газаны толук блокадага алып, анклавда аскердик операция баштаган.
Үстүбүздөгү жылдын 2-мартынан бери Израилдин чечими менен Газага эл аралык гуманитардык жардам жетпей жатат, бардык чек ара көзөмөл пункттары жабык бойдон калууда.
18-майда Израиль армиясы Газанын түндүк жана түштүк аймактарында “Гидеондун арабалары” деп аталган кеңири масштабдагы аскердик операцияны баштаганын жарыялаган. Максат — ХАМАСты толук жок кылуу жана барымтадагы израилдиктерди бошотуу. Нетаньяху операциянын жыйынтыгында Газанын бүт аймагын Израиль армиясы көзөмөлгө аларын билдирген.
















