Эки күн башта Түркиянын Башкы прокуратурасы борбор калаадагы башкармалыктын үч полиция кызматкерине «Айхан Бора Каплан» кылмыштуу уюмуна тиешеси бар деген шек менен үйлөрүн тинтип, тергөө ишин баштаган.
Ушундан кийин «Түрк улутчулдар» партиясынын лидери Девлет Бахчели парламентте сөз сүйлөп, бул кутум болушу мүмкүн экенин айтып чыкты. Бул тууралуу түрк ЖМКлары жазды.
“Бир нече полиция кызматкеринин кызматтан алынышы эч нерсени чечпейт, бирок мындай көрүнүш өлкөдө 2016-жылдагыдай кайрадан төңкөрүш аракети болушу мүмкүн дегенди билдирет”,-деген ал.
Мындан кийин президент Режеп Тайып Эрдоган Юстиция министри Йылмаз Тунч жана Улуттук чалгындоо уюмунун төрагасы Ибрахим Калын менен президенттик резиденцияда кечинде чукул жыйын өткөрдү. Бул тууралуу Türkiye гезити жарыялады. Эми Эрдоган парламенттеги башкаруучу партиянын кеңейтилген жыйынында сөз сүйлөрү күтүлүүдө.
2016-жылы ишке ашпай калган төңкөрүш аракети
2016-жылдын 15-июлунан 16-июлуна караган түнү азыркы Президент Эрдоганды бийликтен кетирүү аракети болгон. Танкалар менен куралданган козголоңчулар бийликтин тарапкерлери менен кагылышкан.
Көтөрүлүштөн кийин өлкөдө 80 миңден ашык адам камакка алынып, 150 миңдей мамлекеттик кызматкер, анын ичинде аскер кызматкерлери жумуштан бошотулган же иштен убактылуу четтетилген.
Түрк бийлиги ал төңкөрүш аракетине FETO (Фетхуллахчы террор уюму) деп атаган оппозициячыл ислам үгүтчүсү Фетхуллах Гүлендин уюмун айыптаган. Бирок АКШда жашаган Гүлен өзү төңкөрүш аракетин айыптап, бийликтин өзүнө карата айтылган айыптоолорун четке каккан.


















