Японияда биринчи жолу “смартфондук деменцияны” аныктоо жана дарылоо боюнча адистештирилген клиника ачылды, деп жазат Sora News.
“Смартфондук деменция” — бул интернетте жана социалдык тармактарда өтө көп убакыт өткөрүүдөн улам эс тутумдун жана көңүл буруунун начарлашына алып келген абал. Мындай абалга туш болгондор дарыгерге жазылуу убактысын, тааныштарынын ысымдарын же бөлмөгө эмне үчүн киргенин унутуп калышат.
Бул көйгөй смартфон жана санариптик технологияларды ашыкча колдонуу адамдын когнитивдик жөндөмдөрүнө терс таасирин тийгизери менен байланыштуу. Kanamachi Ekimae Neurological Clinic аталган багытта пионер болуп эсептелип, өлкө боюнча бейтаптар үчүн бетме-бет жана онлайн консультацияларды сунуштоодо.
Клиника белгилегендей, бул абал ар кандай курактагы адамдарга тиешелүү болушу мүмкүн, бирок эң көп гаджет колдонгон адамдарда көбүрөөк кездешет. Дарылоо бейтаптын жеке көнүмүштөрүнө жана психикалык саламаттыгына жараша жүргүзүлөт. Ал жашоо образынын өзгөрүшүн, гаджеттерди колдонуу боюнча сунуштарды, ал тургай зарыл болсо, дары-дармекти колдонууну камтышы мүмкүн.
Дарыгерлер эскертишет: алдын алуу — “смартфондук деменцияга” каршы эң жакшы чара. Адистер түзмөктөрдү колдонуудан үзгүлтүк алып туруу, тирүү баарлашууга, хоббиге жана айлана-чөйрөнү байкоого убакыт бөлүп турууну сунуш кылышат.
















