Кечээ, 24-июлда Израилдин парламенти – Кнессет сот реформасына байланыштуу биринчи мыйзам долбоорун жактырды. Мыйзам долбоору Жогорку Соттун өкмөт чыгарган чечимдерди жокко чыгаруу укугун чектейт.
Мыйзамдын кабыл алынышы Израилдин сот системасында сот реформасы башталгандан берки биринчи чоң өзгөрүүнү билдирет. Мыйзам долбоору бүткүл оппозиция добуш берүүгө бойкот жарыялаганына жана коомчулуктун каршы болгондугуна карабай кабыл алынды, бул Израилдин саясий турмушунда болуп көрбөгөндөй окуя болду.
Документке 120 орундуу парламенттеги башкаруучу коалициянын 64 депутаты добуш берди.
Сот реформасына каршы чыккандар өлкөнүн ар кайсы аймактарында, анын ичинде борбор шаары Тель-Авивде массалык нааразылык акцияларына чыгышты.
Ynet порталынын маалыматына караганда, Тель-Авивдеги нааразылыкка он миңдеген адамдар чыкты. Полиция аларды таркатуу үчүн атчан полицияларды жана көк боёк кошулган суу аткычтарды колдонуп, демонстранттарды шаардын борбордук бөлүгүндөгү Каплан көчөсүнөн сүрүп чыгарууга аракет кылууда.
Алар өкмөткө каршы ураандарды кыйкырып, таштандыларды өрттөшүүдө.
מכתזיות בכינון ישיר לראשי מפגינים. איילון צפון.
קרדיט: אחים לנשק pic.twitter.com/AK6FQoxHDk— ?️??ShAuLi (@Shaulirena) July 24, 2023
Акциянын катышуучуларынын бир бөлүгү шаардын түндүгүндөгү магистралда жол кыймылын жаап алышкан. Жолдо чогулгандардын бир бөлүгүн унаа сүзүп, төрт адам жабыркап, ооруканага жаткырылды, деп жазат Ynet.
Соцтармактарда тараган видеодон жол тосуп, чогулган элди унаа атайылап сүзүп кеткенин көрүүгө болот.
Акция учурунда полиция кызматкерлерине кол салып, коомдук тартипти бузган 18 киши кармалып, 10 полициячы жаракат алганын The Times of Israel гезити полициянын билдирүүсүнө таянып жазды.
Police penned in protesters. Charging them with cavalry. pic.twitter.com/UF3Dw4vt3p
— Eylon Levy (@EylonALevy) July 24, 2023
Массалык нааразылык акцияларынын фонунда сот реформасынын башкы идеологу, Израилдин премьер-министри Биньямин Нетаньяху кайрылуу жасады. Ал чоң реформа тууралуу «ачык айтууга» даяр экенин билдирди. Анын айтымында кабыл алынган мыйзам “бийлик бутактарынын ортосундагы белгилүү бир тең салмактуулукту калыбына келтирүү үчүн” зарыл болгон.
Натаньяхунун билдирүүсүнө оппозициянын лидери, мурдагы премьер-министр Яир Лапид реакция кылып, анын сөздөрүн “куру сөз” деп атады.
Белгилей кетсек, өлкөдө сот реформасына каршы ири демонстрациялар жарым жылдан ашуун убакыттан бери уланууда. Ал өлкөнүн тарыхындагы эң ири акция болуп калды, март айында нааразычылык акциясына жарым миллионго чейин адам чыккан.
