Газанын Саламаттык сактоо министрлиги: Израиль дагы 45 палестиналыктын сөөгүн өткөрүп берди.
Газанын Саламаттык сактоо министрлиги Израил менен туткундарды алмашуу жана ок атышпоону сактоо келишиминин алкагында Израилден дагы 45 палестиналыктын сөөгүн алганын жарыялады.
Министрликтин Telegram баракчасында жарыяланган билдирүүгө ылайык, Эл аралык Кызыл Крест комитетинин (МККК) өкүлдөрү аркылуу Израилден 45 палестиналыктын сөөгү өткөрүлүп берилди.
Билдирүүдө 14-октябрда Израилден 45 кишинин сөөгү алынганы белгиленип, ушуну менен Израил жалпы 90 палестиналыктын сөөгүн кайтарганы айтылды.
Маалыматка караганда, палестиналыктардын сөөгүн таануу үчүн зарыл болгон медициналык изилдөөлөр жүргүзүлөт.

ХАМАС дагы эки израилдик туткундун сөөгүн Кызыл Крестке өткөрдү
Газа секторундагы ок атышпоону жана туткундарды алмашуу келишиминин алкагында ХАМАС Эл аралык Кызыл Крест комитетине дагы эки израилдик туткундун сөөгүн өткөрдү.
Израил армиясынын билдирүүсүндө айтылгандай, эки израилдик туткундун табыты Газа секторундагы жолугушуу жеринде Кызыл Кресттин өкүлдөрүнө тапшырылган.
Кызыл Крест делегациясы табыттарды Израил армиясына тапшыруу үчүн жолго чыккан.
Азыркыга чейин ХАМАС Газада каза болгон 28 туткундун ичинен 8инин сөөгүн өткөрүп берген.
Берилген 8 сөөктүн бири Непалдын жаранына таандык экени белгилүү болду. Израил болсо алардын бир сөөгү израилдик туткунга тиешелүү эмес экенин билдирген.
Өз кезегинде Израил Газада кармалган 90 палестиналыктын сөөгүн кайтарды.

Газадагы ок атышпоо жана туткундарды алмашуу келишими
9-октябрда АКШнын президенти Дональд Трамп Египетте жүрүп жаткан сүйлөшүүлөрдүн жүрүшүндө Израил менен ХАМАС Газадагы ок атышпоонун биринчи этабын колдогонун жарыялады.
Келишим сүйлөшүүлөр жүргөн Египетте кол коюлуп, 10-октябрда Израил өкмөтүнүн макулдугу менен күчүнө кирди.
Келишимге ылайык, Израил армиясы «сары сызыктан» артка чегингенден кийин, ошол эле күнү түшкү саат 12:00дө Газада ок атышпоо режими күчүнө кирди.


















