Израилдин аба күчтөрү ХАМАС менен мурда макулдашылган ок атышпоо келишимин бузуп, Газа тилкесине кайрадан массивдүү сокку урду.
Газага жасалган соккудан каза болгондордун саны 30га жеткенин жарандык коргонуунун өкүлү Махмуд Басал “France Presse” агенттигине билдирди.
“Израилдин Газа тилкесине жасаган соккуларынын натыйжасында кеминде 30 киши набыт болду, ондогон адамдар жарадар болду”, – деп билдирди ал.
Соккулардан Газа шаарында, Бейт-Лахияда, аль-Бурейжде, Нусейратта жана Хан Юнисте үйлөр жана мектептер жабыркады.
Күн мурун 28-октябрда Израилдин премьер-министри Биньямин Нетаньяху Газа тилкесине сокку урууга буйрук берген. Мунун алдында анын кеңсеси палестиналык ХАМАС кыймылын ок атышпоо келишимин бузганын, башка туткундун сөөгүнүн ордуна мурда эки жыл мурун өткөрүлүп берилген сөөктүн бир бөлүгүн кайтарып берди деп айыптаган.
Нетаньяхунун буйругунан кийин ХАМАС дагы бир барымтадагы адамдын сөөгүн Израилге азырынча бербей турганын билдирди.
АКШнын президенти Дональд Трамп анын аракеттери менен жетишилген ок атышпоо келишимин “эч нерсе” буза албайт деп билдирди.
Тель-Авив менен палестиналык ХАМАСтын ортосундагы ок атышууну токтотуу келишими 10-октябрда күчүнө кирген. Бул келишимдин алкагында ХАМАС 2023-жылдын 7-октябрынан бери Газада кармалып турган 20 туткунду бошотуп, муну менен бардык туткундарды өткөрүп берди. Палестинанын туткундардын иштери боюнча медиа кеңсеси Израил келишимге ылайык, палестиналык 1718 туткунду жана өмүр бою эркинен ажыратылган же узак мөөнөткө кесилген 250 туткунду бошоткондугун ырастаган. Келишим боюнча ХАМАС барымтада каза болгон израилдиктердин сөөгүн өткөрүп берип жаткан.


















