Акцияны өлкөдөгү эң ири профсоюздардын бири – Италиянын Эмгек конфедерациясы уюштурду. Алар мунун менен Палестинага жана Израиль тарабынан кармалган эл аралык “Сумуд” флотилиясын колдоо миссиясына тилектештик билдиришти. “Сумуд” флотилиясынын кемелери Газа тилкесиндеги блокаданы бузууну көздөп, Газага символикалык көлөмдөгү гумжардам алып бара жаткан.
Аталган флотилиянын курамында болгон бир нече өлкөнүн жарандары, анын ичинде 40 италиялык активист Израиль бийлиги тарабынан кармалган. Италиянын Тышкы иштер министрлигинин маалыматына караганда, алар жакын арада мекенине кайтарылат. Кармалгандардын арасында төрт депутат (анын экөө Европа парламентинен) бошотулуп, Римге кайтып келишти.
ANSA агенттигинин маалыматы боюнча, митинг айрым аймактарда поезддердин жана шаар четиндеги электричкалардын каттамдарынын токтошуна жана кечигишине алып келди. Ошондой эле порт кызматкерлери акцияга кошулуп, Ливорно портунун кире беришинде жүк ташуучу автоунаалардын узун кезегин пайда кылды.
Рим, Милан, Неапол жана Турин шаарларында миңдеген адамдар Палестинанын желектерин көтөрүп, колдоо жүрүштөрүнө чыгышты. Үч күн катары менен уланып жаткан каршылык акциясынын катышуучулары айрым шаарларда полиция менен кагылышты. Болонья жана Туринде вандализм окуялары орун алып, митингчилер Туриндеги Хай-тек жумалыгы өтүп жаткан жайга кирип барып, чоң экрандар менен стенддерди талкалашты. Бул иш-чарага жума күнү Европа комиссиясынын төрайымы Урсула фон дер Ляйен жана Amazon компаниясынын негиздөөчүсү Жефф Безос катышары күтүлүп жаткан.
Өлкөнүн укук коргоо органдары бул баш аламандыктарды жоюу үчүн күчөтүлгөн тартипке өткөрүлдү. Бирок Италиянын эмгек мыйзамдарына ылайык, күч органдары бул митингди мыйзамсыз деп таанып, өкмөт уюштуруучуларга айып пул салуу мүмкүнчүлүгүн караштырууда.
Бул нааразылык акциялары ачык эле өкмөткө каршы маанайда жүрүп жатат. Анткени оппозиция премьер-министр Джорджа Мелонинин өкмөтүн “Палестина элине каршы Израилдин саясатын колдоп жатат” деп айыпташууда. Ал эми Мелони акцияны «дем алыш күндөрүн улантуу аракети» деп сындады.
Италияда акыркы айларда Палестинаны колдогон акциялар көбөйүп, Мелони өкмөтүнүн Израиль тараптуу саясаты сынга алынууда. Өлкөдө темир жол жана порт тармагындагы митингдер мамлекеттик кызматтардын ишине олуттуу тоскоолдук жаратып, коомдук транспорттун токтоп калышына алып келген.

















