Италиянын башкаруучу Лига партиясы Дүйнөлүк Саламаттыкты сактоо Уюмунан чыгууда Кошмо Штаттарды ээрчий турган мыйзам долбоорун парламентке киргизди.
Бул тууралуу партиянын лидери Маттео Сальвини билдиргенин РИА Новости жарыялады.
“Италия мындан ары италиялык салык төлөөчүлөр тарабынан каржыланган, трансулуттук фармацевтикалык компаниялар менен бирге иштеген улуттар аралык күч борбору менен иштеше албайт”,-деп жазган ал.
Ал “бул 100 миллионду (евро)” Италиядагы бейтаптарды колдоо жана италиялык ооруканалар менен дарыгерлерди каржылоо үчүн колдонууну сунуштады.
Эске салсак, ушул жылдын 21-январында АКШнын президенти Дональд Трамп АКШны ДСУдан чыгаруу боюнча буйрукка кол койгон.
Трамп бул документке ушуну менен экинчи ирет кол койду. Алгач ал 2020-жылы аталган уюм коронавирустук пандемияга туура эмес мамиле кылды деп эсептеген. Ал эми азыр АКШ бул уюмга башка өлкөлөргө салыштырмалуу өтө көп акча берип жатат деген.
Бүткүл дүйнөлүк саламаттыкты сактоо уюму Бириккен Улуттар Уюмуна (БУУ) 194 мүчө-мамлекеттен турган атайын кызматташтык келишими менен байланышкан көз карандысыз эл аралык уюм. Анын негизги функциясы – эл аралык саламаттык сактоо маселелерин чечүү болуп саналат.


















