17-февраль күнү Женевада Тегерандын өзөктүк программасына байланыштуу маселелерди чечүү боюнча Иран менен АКШнын ортосундагы сүйлөшүүлөрдүн экинчи айлампасы өттү. Иран делегациясын Тышкы иштер министри Аббас Аракчи, ал эми америкалык делегацияны АКШ президентинин өкүлү Стив Виткофф жетектеди.
Ирандын тышкы иштер министри Аббас Аракчи Иран менен АКШ конструктивдүү атмосферада олуттуу сүйлөшүүлөрдү жүргүзүп, тараптар өзөктүк маселе боюнча идеялар менен алмашышканын билдирди.
“Бул раундда биз мурункусуна салыштырмалуу абдан олуттуу маселелерди талкууга койдук, атмосфера конструктивдүү болду деп айта алам. Ар кандай идеялар талкууга коюлду, биз бул идеялар боюнча олуттуу талкууларды жүргүздүк, акырында биз кармана турган, андан кийин мүмкүн болуучу келишимдин текстине өтө турган жетектөөчү принциптерди иштеп чыктык”, – деди ирандык министр.
Ал эми кийинки айлампа качан өтүшү мүмкүн деген суроого жооп берип жатып, азырынча так дата белгиленбегенин, эки тарап мүмкүн болгон келишимдин тексттеринин үстүндө иштеп, кийин аларды өз ара алмашкан соң үчүнчү айлампанын датасы аныкталарын айтты.
Ал ошондой эле 16-февралда МАГАТЭнин башкы директору Рафаэль Гросси менен Ирандын өзөктүк досьесине байланыштуу бир катар техникалык маселелер боюнча жакшы талкууларды өткөргөнүн кошумчалады.
АКШ азырынча жолугушуу боюнча комментарий бере элек.
Буга чейин АКШнын президенти Дональд Трамп Тегеран менен келишим ишке ашпай калса, АКШнын Аскер-деңиз күчтөрүнүн экинчи согуштук тобу Жакынкы Чыгышка жөнөй турганын билдирген.
Күн мурун Ирандын жогорку лидери Али Хаменеи АКШнын коркутууларына жооп берип, кээде дүйнөдөгү эң күчтүү армия да ордунан тура албай калгыдай сокку алышы мүмкүн экенин эскертти.
«Кээде эң күчтүү армия да ордунан тура албай калгыдай сокку алышы мүмкүн. Алар (америкалыктар) Иран тарапка кеме жөнөткөнүн дайыма айтып келишет. Албетте, флот – коркунучтуу нерсе, бирок андан да коркунучтуусу – бул кемени деңиз түбүнө түшүрө ала турган курал», – деп билдирди Хаменеи.
Ошондой эле Хаменеи АКШ президенти Дональд Трамп Иранды жок кыла албай турганын белгилеген.
Иран-АКШ сүйлөшүүлөрүнүн биринчи айлампасы 6-февралда Омандын ортомчулугу менен өлкөнүн борбору Маскатта өткөн.

















