Израилдик “Каn” телеканалы Иран үчүн тыңчылык кылган деп шектелген израилдик жаран Израил армиясынын жогорку командачылыгынын кеңсесине жана “Кирия” деп аталган штабдын сезимтал бөлүмдөрүнө чейин кире алганын билдирди.
Ирандык “Mehr news” агенттигинин маалыматына ылайык, аталган израилдик телеканал Иран үчүн тыңчылык кылган деп айыпталган адам Израилдин мурдагы премьер-министри Нафтали Беннеттин үйүн сүрөт жана видеого тартып алганын, ошондой эле бир нече жолу Израил армиясынын Башкы штабынын жетекчиси Эяль Замир менен жолугуп, анын кабинетинде оңдоо иштерин жүргүзгөнүн кабарлады.
Бирок бул жолугушуулар качан болгон, эмне тууралуу сүйлөшүлгөнү жана ал адам купуя маалыматтарды кантип алгандыгы тууралуу азырынча так маалымат жок.
Маалыматка ылайык, ал адам Кириядагы атайын корголгон командачылык бөлмөсүнө да кирип, ал жерде да оңдоо иштерин жүргүзгөн.
Буга чейин израилдик маалымат каражаттары Израилдин коопсуздук кызматтары Вадим Куприянов аттуу адамды Ирандын чалгын кызматы менен кызматташкан деген айып менен камакка алганын билдиришкен. Ал Нафтали Беннеттин жашаган жерин айланасын сүрөт-видеого тартып жүргөн деп шектелүүдө.
Айыптоо корутундусуна ылайык, ал бул тапшырмаларды акчалай сыйлык үчүн аткарган. Анын иштеринин арасында соода борборлорун документтештирүү, товарлардын бааларын каттоо, туристтер үчүн SIM-карталарды сатып алуу сыяктуу тапшырмалар болгон.
Анын эң маанилүү аракеттеринин бири — унаага камера орнотуп, Беннеттин үйүнүн айланасынан түз эфирдеги видеолорду жөнөтүү болгон.
Учурда бул иш Лод шаарындагы борбордук сотто каралууда.
Акыркы жылдары Израилдин жогорку даражалуу өкүлдөрүнө каршы тыңчылык жана коопсуздукка байланышкан иштер бир нече жолу ачыкка чыккан. Бул жаңы иш да Израилдин ички жана тышкы коопсуздугуна байланышкан кооптонууларды күчөтүп, коркунучтар күтүлбөгөн жолдор аркылуу да эң маанилүү объекттерге жетиши мүмкүн экенин көрсөттү.
Иран акыркы жылдары ар кандай ыкмалар менен Израилдин аскердик жана коопсуздукка тиешелүү маалыматтарына жетише алган. Бул аскердик жабдуулар жана штабдар тууралуу купуя маалыматтарды чогултуудан тартып, жогорку кызмат адамдарынын кеңселерине жана командачылык борборлорго чейин кирүүнү камтыйт.
Коопсуздук боюнча адистердин айтымында, мындай жетишкендиктер Ирандын аймактагы чалгын мүмкүнчүлүктөрүн жана стратегиялык пландаштыруу дараметин олуттуу түрдө бекемдеген.

















