Иранда Каспий деңизинин түштүк жээгиндеги Гилян провинциясында Решт-Каспиан темир жол линиясы ишке берилди. Аталган тилке “Түндүк-Түштүк” эл аралык транспорт коридорунун бир бөлүгү болуп саналат.
Иш-чарага президенттин милдетин аткаруучу Мохаммад Мохбер катышты.
Ирандын түндүгүндөгү Решт шаарынан Каспиан портуна чейинки бөлүгү – Решт-Астара темир жолунун курулушунун баштапкы этабы. Келечекте Каспиан портунан Ирандын түндүк-батышындагы Астара шаарына чейинки жолдордун кийинки бөлүгүн куруу пландалууда.
Решт-Каспиан темир жолу “Түндүк-Түштүк” эл аралык транспорт коридорун бүтүрүү үчүн Ирандагы эң маанилүү жана эң артыкчылыктуу темир жол долбоорлорунун бири болуп саналат. Бул долбоор Ирандын Жакынкы Чыгыш аймагы жана Европа өлкөлөрү менен соодасы үчүн чоң мааниге ээ.

Узундугу 37 чакырымды түзгөн Решт-Каспиан темир жолу Ирандын түштүк жана түндүк портторун бириктирүүгө мүмкүндүк берет, бул Каспий деңизи менен Перс жана Оман булуңдарынын ортосундагы байланышты билдирет.
Гилян провинциясынын губернаторунун курулушка уруксат берүү боюнча орун басары Муса Факурдун айтымында, бул темир жол долбоору боюнча иштер мындан беш жыл мурун башталган. Маршруттун бир аз бөлүгү “Энзели” соода-өнөр жай аймагынын ичинде жайгашкан.
“Түндүк – Түштүк” эл аралык транспорт коридору – Санкт-Петербургдан Мумбай портуна (Индия) чейинки мультимодалдык маршрут, коридордун узундугу 7,2 миң километрди түзөт.

Бул коридордо үч маршрут бар – транскаспий (темир жолдорду жана портторду пайдалануу менен), ошондой эле батыш жана чыгыш кургактагы жолдор.
Россия менен Иран 2023-жылдын май айында “Түндүк-Түштүк” коридорунун батыш багыты боюнча Ирандагы Решттен Астарасына чейинки темир жолдун 1,6 миллиард евролук акыркы бөлүгүн бүтүрүү боюнча документтерге кол коюшкан.


















