Ирандын Бандар-Аббас шаарындагы портто болгон жарылуу шалаакылыктан улам болгонун өлкөнүн ички иштер министри Искандар Момени Иран телеканалынын эфиринде билдирди.
“Иликтөө жүргүзүү үчүн комиссия түзүлдү, күнөөлүүлөр кармалды, алар жарылуу боюнча айрым маселелерди түшүндүрүштү, тергөө жүрүп жатат. Бул каргашалуу окуя кандай болгонун кечээ эле түшүндүргөм. Шалаакылык, атап айтканда, коопсуздук эрежелерин бузуу жана этиятсыздык болду”, – деди Момени.
26-апрелде Бандар-Аббас шаарындагы Шахид Ражаи портунда катуу жарылуу болгон. Жергиликтүү маалымат каражаттарынын айтымында, жарылуу күчтүү болгондуктан, Бандар Аббастан 20 чакырымдай алыстыктагы Перс булуңундагы Кешм аралында да угулган.
Буга чейин жарылуу химиялык заттар контейнерде туура эмес сакталгандан улам чыкканы жана экинчи версия боюнча күйүүчү май сакталган резервуарда өрт чыгып, андан улам жарылуу болгону да айтылган.
Акыркы маалыматтар боюнча, окуяда 70 адам каза болуп, 1200дөн ашууну жаракат алган.
Учурда порт кадимки режимде иштеп жатат, бирок эң керектүү товарлардын сегиз пайызын гана кабыл алууда.
Күн мурун өлкө президенти Масуд Пезешкиан окуя болгон жерге барган. Ал келечекте мындай жагдайлардын кайталанбашын буйруду.
РФ лидери Владимир Путин Шахид Ражаи портундагы өрттү өчүрүүгө жардам берүү үчүн Өзгөчө кырдаалдар министрлигинин бир нече учагын Иранга жөнөткөн. Бе-200ЧС жана Ил-76 учактары порттогу өрттү өчүрүүгө катышты.
Шахид-Ражаи – Ирандагы эң ири соода порту. Ал Ормуз кысыгынын жанында жайгашкан. Бул жер Ирандын эң чоң контейнердик түйүнү катары өлкөнүн суу аркылуу ташылчу жүктөрдүн болжол менен 90%ын тейлейт. Анын аянты 2400 гектарга жакын. Дал ушул транспорттук түйүн “Түндүк-Түштүк” экономикалык долбоорунда маанилүү роль ойнойт.














