Иран Бахрейн, Сауд Арабиясы, Катар, БАЭ жана Иорданиядан АКШ менен Израилдин Иранга каршы операциясындагы ролу үчүн компенсация талап кылды.
Бул туурасында Ислам Республикасынын БУУдагы туруктуу өкүлү Амир Саид Ираванинин катында айтылат.
Документ Бириккен Улуттар Уюмунун Башкы катчысы Антониу Гутерришке жана БУУнун Коопсуздук Кеңешинин төрагасына жолдонгон.
“Бахрейн Падышачылыгы, Сауд Арабиясы Падышачылыгы, Катар мамлекети, Бириккен Араб Эмираттары жана Иорданиянын Хашимит Падышачылыгы Иран Ислам Республикасына толук компенсация төлөп бериши керек, анын ичинде алардын мыйзамсыз аракеттеринин натыйжасында келтирилген бардык материалдык жана моралдык зыяндын ордун толтурушу керек”, – деп айтылат текстте.
Иравани бул мамлекеттер Иранга каршы агрессия үчүн өз аймактарын гана бербестен, айрым учурларда алар Иран Ислам Республикасынын жарандык объектилерине багытталган мыйзамсыз куралдуу кол салууларга түздөн-түз катышканын белгиледи.
“Бул мамлекеттердин өз аймактарын агрессорлорго Иран Ислам Республикасына каршы пайдалануусуна жол берген жүрүм-туруму агрессия актысы катары бааланат”, – деп кошумчалады дипломат.


















