Иран аба мейкиндигин жарым-жартылай ачып, республиканын чыгыш бөлүгүндө эл аралык жана ички каттамдарга уруксат берилди.
Бул тууралуу Ирандын жолдор жана шаар курулуш министрлигинин басма сөз катчысы Мажид Ахаван билдиргенин Mehr агенттиги маалымдады.
“Аба каттамдарын акырындык менен кадимки режимге кайтаруу максатында өлкөнүн чыгыш бөлүгүндөгү аба мейкиндиги учуулардын коопсуздугун толук камсыз кылуу менен эл аралык транзиттик каттамдар үчүн, ошондой эле Ирандын чыгышында гана жайгашкан аэропорттордон учуп же аларга бара турган ички жана эл аралык каттамдар үчүн ачылды”, – деп билдирди Ахаван.
Ал белгилегендей, каттамдарды жөнөтүүгө жана кабыл алууга уруксат алган аэропорттордун тизмесине Ирандын чыгышындагы шаарлар, атап айтканда, Боджнурд, Сабзевар, Мешхед, Бирдженд, Заболь, Захедан, Сараван, Чабахар, Ираншахр, Серахс, Гонабад, Джирофт жана Жаск шаарларында жайгашкан аэропорттор кирет.
Ахаван Ирандын түштүк, түндүк жана батыш шаарларындагы аэропортторго, анын ичинде Мехрабад аэропортунан жана Имам Хомейни эл аралык аэропортунан ички жана эл аралык каттамдардын учуп келүүсүнө тыюу салуу кийинки билдирүүгө чейин күчүндө болорун кошумчалады.
Эске салсак, 13-июнга караган түнү Израилдин чабуулунан кийин Иранда ички жана эл аралык каттамдар токтотулган. Ошол эле маалда өлкөнүн аба мейкиндиги жабылып, 12 күндөн ашык убакытка узартылган.
Аймактагы кырдаал Израил Иранга сокку урганда тутанган. Кол салуудан Ирандын куралдуу күчтөрүнүн Башкы штабынын жетекчиси, Ислам революциясынын сакчылар корпусунун командачысы жана илимпоздор көз жумган. Ислам республикасы ага жооп кайтарып, Израил тарапка ракеталарын ата баштаган. 22-июнда түндө жаңжалга АКШ аралашып, Ирандагы өзөктүк оюбъекттерге сокку урду. Ага жооп кылган Иран 23-июнь кечинде АКШнын Катарда жайгашкан эң ири Аль-Удейд аскердик базасына чабуул койду.



















