Кыргызстанда мечиттердин имамдарынын маянасын 25 миң сомго чейин көбөйтүү пландалууда. Бул тууралуу Дин иштери жана этностор аралык мамилелер боюнча улуттук агенттиктин төрагасы Талантбек Ташибеков билдирди.
Анын айтымында, бүгүнкү күндө президент Садыр Жапаров тарабынан демилгеленип, өлкөдөгү мечиттердин имамдарына 15 миң сомдон айлык берилип жатат.
“Буга чейин “Ыйман” фонду тарабынан имамдарга маяна берилип келген. Бирок бир канча жыл бою айлыктар берилбей токтоп калган. Алдыда биз имамдардын айлыгын 25 миң сомго чейин көбөйтүүнү пландап жатабыз”, – деди ал.
Талантбек Ташибеков белгилегендей, Кыргызстанда учурда 4 миңден ашык мечит катталган.

Мындан тышкары мамлекет башчынын дагы бир Жарлыгына ылайык маркум Чубак ажы Жалиловго эң жогорку даражадагы «Ак Шумкар» өзгөчө белгиси тапшырылып, «Кыргыз Республикасынын Эл баатыры» даражасы ыйгарылды.
Чубак ажы Жалилов диний билим берүүнү жана руханий агартууну өнүктүрүүгө, моралдык-адеп-ахлактык баалуулуктарды калыптандырууга, элдин маданий-диний салттарын сактоого өзгөчө салым кошкон.
Ал 2020-жылы пандемия учурунда каза тапкан.





















