2026-жылдын 5-августунан тартып Кыргызстандын мусулмандарынын дин башкармалыгынын Бишкек шаарындагы өкүлчүлүгүнө караштуу бардык имамдар бирдиктүү формага өтүштү. Бул тууралуу Муфтияттын расмий сайтында жарыяланды.
Бул демилге Азирети Муфтий Абдулазиз кары Закиров тарабынан көтөрүлүп, Кыргызстан боюнча имамдардын бирдиктүү формада кызмат өтөөсүн камсыздоону көздөйт.
4- август күнү КМДБнын Бишкек шаарындагы өкүлчүлүгү райондук баш имам-хатибдер менен жыйын өткөрүп, аларга ак чепкендер жана ак селделер тапшырылды. Өз кезегинде төрт райондун баш имам-хатибдери өз аймактарындагы имамдарга бирдиктүү формаларды таратып беришти.
Ак чепкен менен ак селде — жөн гана кийим эмес. Ал имамдын жоопкерчилигин, тартипти, адеп-ахлакты, биримдикти жана элге үлгү болуу миссиясын айгинелеген символ.
“Бул демилге аркылуу имамдардын сырткы көрүнүшүндө да бирдиктүүлүк калыптанып, алардын коом алдындагы кадыр-баркы жана жоопкерчилиги дагы да бекемделет.
Аллах Таала жалпы имамдарыбыздын жана бардык дин кызматкерлеринин эмгегине береке берип, элибизге кылып жаткан кызматтарын кабыл кылсын”,- деп айтылат Муфтияттын билдирүүсүндө.



















