Илон Маск өзүнүн социалдык медиа аккаунтунда жогорку ылдамдыктагы Starlink интернетинин Казакстанда жеткиликтүү болгонун жарыялады.
Бул маалыматты Казакстандын санариптик өнүктүрүү, инновациялар жана аэрокосмостук өнөр жай министри Жаслан Мадиев тастыктаганын Zakon.kz агенттиги жазды.
“Starlink расмий түрдө Казакстанда! Биз Starlink менен мамлекеттик органдардын жана жөнгө салуучу органдардын позицияларын жакындатуу үчүн бир жылдан бери сүйлөшүүлөрдү жүргүзүп жатабыз”, – деп билдирген Мадиев.
Ал белгилегендей, бүгүн Starlink Казакстанды өзүнүн расмий катышуусунун картасына кошкон.
Ж. Мадиев Илон Маскка жана бүтүндөй Starlink командасына эффективдүү иши жана кызматташуусу үчүн өзгөчө ыраазычылык билдирерин кошумчалаган.
Ал эми Казакстандын Санариптик өнүктүрүү, инновациялар жана аэрокосмостук өнөр жай министрлигинин басма сөз кызматы 2025-жылдын 13-августунан тартып Starlink расмий түрдө өлкөдө спутниктик интернет кызматтарын көрсөтө баштай тургандыгын жарыялаган.
“Өлкөнүн тургундары SpaceX компаниясына таандык Starlink төмөн орбиталык спутниктик тармагы аркылуу жогорку ылдамдыктагы жана ишенимдүү интернетке кире алышат”,- деп айтылат министрлик берген маалыматта.
Бөлүм Starlink технологиясы эң алыскы жана жетүүгө кыйын аймактарда да туруктуу байланышты камсыздап, калк үчүн заманбап санариптик кызматтарга жеткиликтүүлүктү ачарын белгилеген.
“Учурдагы тарифтер, кошулуу шарттары жана кошумча маалыматты SpaceX компаниясынын расмий сайтынан тапса болот”, – деп жазат басма сөз кызматы.
Кошумчалай кетсек, 2025-жылдын 12-июнунда Казакстандын Санариптик өнүктүрүү, инновациялар жана аэрокосмостук өнөр жай министрлиги менен Starlink компаниясы кызмат көрсөтүүдө Казакстандын мыйзамдарын сактоо боюнча компаниянын милдеттенмесин камсыз кылган келишимге кол коюшкан.



















