Палестиналык ХАМАС кыймылы менен Израиль элдешүүнүн мөөнөтүн дагы бир күнгө узартты. Буга чейин гуманитардык тыныгуу бир гана жолу — 27-ноябрда эки күндүк мөөнөткө узартылган.
Израиль элдешүү бир күнгө узартылганын ырастады. Израиль ок атышпоо режимин узартууга ХАМАС кыймылы 29-ноябрда бошотууну пландап жаткан барымтадагы 10 адамдын жаңы тезмесин бергенден кийин макул болгон.
Кийинчерээк ХАМАС жана Катар ушундай эле шарттарда элдешүү бир күнгө узартылганын ырасташты.
Аскердик операциядагы тыныгуу бүгүн 30-ноябрь эртең менен саат 07:00дө аякташы керек болчу. Анын алдында ХАМАС кыймылы барымтадагы жети аялды жана балдарды бошотууну, ошондой эле каза болгон дагы үч израилдик жарандын сөөгүн берүүнү сунуштаганын, бирок Израиль аны четке какканын билдирген. Келишимге ылайык, ХАМАС бир күндө кеминде 10 барымтадагы адамды бошотууга тийиш. Израиль да өз кезегинде ар бир 10 кишинин бошотулушуна, 30 палестиналык туткунду бошотот.
Израиль менен ХАМАСтын ортосундагы согуш 55-күндөн бери уланууда. 7-октябрь эртең менен палестиналык ХАМАС кыймылы «Аль-Акса Топон суусу» операциясынын алкагында Израилге Газа тилкесинен болуп көрбөгөндөй масштабдуу ракеталык чабуул жасады. Андан соң кыймылдын жоокерлери Израилдин түштүгүндөгү чек ара аймактарына кирип, 200дөн ашуун адамды барымтага алышкан. Израиль бийлигинин акыркы маалыматтарына караганда, 1,2 миңге жакын адам набыт болду, алардын катарында жай тургундар, аскерлер, чет элдик жарандар бар. Ошондой эле 5 миңден ашууну жарадар болгону кабарланган.
Буга жооп катары Израилдин Коргонуу күчтөрү Газа тилкесинде ХАМАСка каршы «Темир кылыч» операциясын баштады. Бир нече күндүн ичинде Израиль армиясы Газа менен чек арага жакын жайгашкан бардык калктуу аймактарды көзөмөлгө алып, Газага абадан сокку ура баштады. Израиль андан сырткары, Газа тилкесин толук блокадага алганын жарыялады: суу, тамак-аш, электр энергиясы, дары-дармек жана күйүүчү май менен камсыздоо токтотулду.
Октябрдын аягында Израиль Газада кургактагы операциясын баштады. Израилдин Газага жасаган соккуларынан каза болгондордун саны 14,8 миңден ашты, 36 миңден ашуун адам жараат алды.
24-ноябрда Израиль менен ХАМАС Катардын жана Египеттин ортомчулугу менен төрт күндүк элдешүүгө макул болушкан. Макулдашуу ошол эле күнү жергиликтүү убакыт менен саат 7.00дө күчүнө кирген. Анын алкагында, тараптар төрт күнгө согуштук аракеттердин бардык түрүн токтотуп, туткундарды алмашууда. Башкача айтканда, барымтадагы бир израилдик үч палестиналык туткунга алмаштырылат. Бул аралыкта Газа секторуна гуманитардык жана медициналык жардам өткөрүлүп турат.
Биринчи этаптын алкагында 25-ноярда ХАМАС кыймылы барымтадагы 12 таиланддык жана 13 израилдикти бошотуп, Израиль 39 палестиналыкты – 24 аял жана 15 жашы жете элек өспүрүмдү кое берген. 26-ноябрда ХАМАС Эл аралык Кызыл Чырым уюмунун өкүлдөрүнө барымтадагылардын үчүнчү тобун өткөрүп берген. Алардын арасында Израилдин 14, Таиланддын үч жараны бар. Ушул эле күнү Израиль түрмөдөгү дагы 39 палестиналыкты бошоткон.
29-ноябрь күнү кечинде ХАМАС барымтадагы 14 кишини бошоткон. Алардын 10у Израилдин, экөө Таиланддын жарандары экени айтылган. Анын алдында Россия менен Израилдин кош жарандыгы бар эки аял бошотулганы айтылган. Буга жооп катары Израиль 30 палестиналык – 15 аял жана 15 өспүрүмдү бошоткон.


















